Ich . Otte . von Everade . vnd ich . Margrete . sein hovsvrowe . vnd ich . Chvne . hern . Otten . brvder
von . Everade . vnd ich . Heinreich . hern . Otten svn von . Everade . vergehen an disem brieve . vnt tvn
ovch chvnt . allen den . die disen brief lesent . oder hoerent lesen . die nv lebent vnd her nach chvnftich sint
daz wir mit gvetem willen . vnd mit verdahtem mvete . vnd ovch mit zeitigem rate vnserre vrivnde .
vnd mit ir gvnst . gigeben haben . dvrch got vnt dvrch vnserre sele willen . dem heiligen . hovse . des spi
tals von sant Johans ze Jerusalem vnt den brvedern von . Mowerperge . ein . lehen . datz . Harraz . mit aller
der gvlte . vnd mit allen dem nvtze . vnt dar zve gehoeret . ze rehtem aigen . getrweichleich . vnd ebichleich ze
haben . an alle ansprache . vnd setzen vns ovch dem vorgenanten spital . ze Jerusalem . vnt den brvedern . von
Mowerpge . vmb daz vorgenante . lehen . datz Harraz ze gewern . vnt ze rehtem scherm . als landes reht
vnd aigens reht ist . vvr alle ansprache . vnd geben in dar vber disen brief . mit vnserm insigel . zeiner
gehvgvnsse . vnt zeiner ebigen vestenvnge dirre sache . vnd mit den geziwgen . die her nach geschriben
stent . den disiv gabe vnt disiv sache wol chvnt ist . Daz ist her . Levtolt . von Chvnringen . her Chvnrat
vnd her . Irnfrit . di brveder von . Pvechsperch . her Hertneit . vnd her . Levtolt . di brvder von . Stadek . daz
sint dienstman . her . Vlreich . der alte von Rvchendorf . her . Chvnrat . von . Braytenvelde . der hofmarschalch von
Osterreuch . her Vlreich . der ivnge von . Rvchendorf . her . Otte . hern . Haimen enenchel . her . Charl . von Hirsowe
her . Otte . von . Mvrresteren . her . Heinreich . von Stranstorf . daz sint ritter . der grozze . Regenwart . vnde
sein svn . Rveger . Regenwart ovf dem wasen . vnd sein brveder . fridereich . Heinreich . von . Braytenvelde .
Pilgreim . von braytenavch . Diser brief ist gigeben . do von Christes gebvrt ist gewesen . Tovsent . iar . zwai
hvndert . iar . vnd in dem Aht vnd ahtzigisten . iare . des svntages nah der ersten . vastwochen . nah der
chottemper .