Von
Wir Chvnrad von gotes genaden Apt des gotshavses ze Melch mit dem Conuent vns(er)r brud(er) tvn chvnt allen
den di nv lebent vnd di h(er)nach chvmftich sint di dysen brief sehent vnd horent lesen. daz zv vns chomen ist d(er) erwer
man brud(er) Eberhard von sande Iohannes orden Comendv(er) ze vvrstenuelde vnd ze loch vnd an des maist(er)s stat ze Merv(er)ge
ze den ceiten vnd hat vns gepeten daz wir im ain sache bestetigen dev gewandelt vnd veriht ist zwisschen im vnd seinem havs
vnd vnserm voruod(er)n Apt fridrichen vnd vns(er)m gotshavse vnd hebt sich dev irihtung an mit dysen worten. Wir fridrich
von gotes genaden Apt des gotshavses von Melch mit dem Conuent vns(er)r brud(er) tvn allen den chvnt di nv lebent
vnd di h(er)nach chvmftich sint. daz wir mit brud(er) levpolten dem Comender(er) von wienen der an des maist(er)s stat ist ze
Merv(er)perige vnd seins conuentes der ansprach vmb di aigenschaft an dem havs ze loch vnd dem weinperge vnd vmb aine(n)
acher der do gelegen ist vns aller dingen gewent haben also. daz wir gegen der uorgesprochen aigenschaft an dem havs
ze loch vnd gegen dem acher nimm(er) dehain ansprach haben sullen. vnd habent vns di uorgesprochen brud(er) von Merv(er)ge
vur vns(er)n chriech gegeben dem gotshavs ze Melch zwar phvnt geltes ze geysribendorf rehtes aigens. Daz nv dirre wid(er)
wechsel vnd dev red stet vnd vnzebrochen beleib des geb(en) wir fridrich Apt ze Melch mit d(er) gemain vns(er)s Conuents den vor
genanten brud(er)n ze Merv(er)ge vns(er)n brief mit vnsern insigeln besigelt ze aine(r) vrchvnde vnd zv ein(er) stetige(n) warnunge
dirre sache. des ist gezevg mein h(er)r levtolt von chvnringe vnd sein reit(er) h(er)r Gotschalch von vlachenek. der perhtolt von
achstain der Otte von vrdorf d(er) Hainrich von swembach vnd and(er) biderwe levt genvch den dysev sache wol chvnt
ist. dyser brief ist gegeben do von chrystes gebvrt ist gewesen tavsent iar zwai hvndt iar in dem and(er)n vnd nevnzigistem
iar. vor sand marteins tag aht tage. Seid ab(er) wir daz erchenne(n) daz vns vnd vns(er)s gotshavses nvcz vnd vrdunge an dem
gewt vnd an dem wid(er)wechsel gemaht ist so hab(en) wir di sache vnd den vorgenante(n) gewt den vorgenante(n) brud(er) Eberharten
vnd dem vorgenante(n) havs bestetiget vnd veruestent mit vns(er)m insigel vnd mit vns(er)r samenvnge insigel ze aine(r) ewigen vr
chvnde. vnd ist dev bestigunge geschehe(n) vnd d(er) brief dar ub(er) gegeben do von chrystes geburd ergangen waren tavsent iar vnd
drev hvndt iar an dem ahtem tag nach sand marteins tage.