Ich Dietreich von puechperch gelezzen ze wazerwerth vnd mein hausvrowe ver Gedravt vnd alle vnser erben
veriehen vnd tven chvnt allen den die disen prief lesent oder hoerent lesen die nv lebent vnd her nach chvnftich sint
Daz wier mit verdahtem mvet vnd mit aller vnser erben gvetem willen avz vnserm aigen zechovffen haben ge
geben den erbern chnehten Hainreichen dem Lauscher vnd Otten seinem prueder vnd allen iern erben ain Lehen
mit aigenschaft vnd ain halbev hofstat vmb aindlefthalb phvnt phenning wienner mvnz der sie vns reht
vnd redleich gewert habent vnd schvllen ovch mit dem selben Lehen vnd mit der halben hofstat allen iern frvmen
schaffen verchovffen versetzen vnd geben swem sie wellent an allen ierrsal als ir aigen daz vor genant Lehen vnd
die halben hofstat ligent datz dem Diepolts an der nidern zeil vnd daz selb Lehen mit sampt der halben hofstat
habent sie gewidemt hintz harraz ovf sand pangretzen alter vnd schol man dienen von dem vor genanten Lehen
vnd von der halben hofstat alle iar aht phenning wienner mvnze ovf den vor genanten alter vnd schol ich Die
treich von puechperch vnd alle mein erben des Gotshovs vnd hainreiches des Lauscher vnd Otten seines prueder
vnd aller ierer erben rehter scherm vnd gewer sein vür alle ansprach als aigens reht ist vnd des Landes gewon
hait ze osterrich. Dar vmbe daz disev red stæt vnd ewich beleib so gib ich Dietreich von puechperch in disen prief
zv einem stætigen vrchvnde diser sach versiglt mit meinem Insigel vnd mit meins lieben frevnts Insigel hern
Albers von chvnring der diser sache antrager vnd werver ist gewesen vnd sind ovch des gezevge her wulfinch
von puechperch her alber von puechperch her wulfinch der strozer hainreich von windorf chvnrat von Levtte
Ortolf von sevndorf hainreich der Gabatscher Goetfrid von harraz Rveger sein prueder chvnrat der Levzer
Dyetmar der præm vnd ander piderbe levt genvech den disev sache wol chvnt ist Der prief ist gegeben do von
Christes gepuerd warn ergangen Drevtzehen hvndert iar vnd dar nach in dem Nevntzehenten iar des eritags
in der antlaz wochen