Ich Weichart vnd ich ocer preid sein hausfrov von Paumgarten vnd ich Hainreich sein sun vnd ich fridreich
sein sun vnd ich Chadolt h(er)n weichartz pruder von paumgarten vn(d) ich margret sein hausfrowe von
paumgarten vnd vnser gerben wir tun chunt allen den die dysen prief sehen lesen oder horen lesen die
nu leben oder hernach chunftich sint daz wir mit gut bedechtichait vnd mit gesamt hant ze den zei
ten do wir iz wol mochten getun vnsers rechten aigens daz wir heten datz posem siesidel durch
vnser vnd vnser vorden sele willen den gaistleichen vnd den erbn brudern sand Johans orden ze Ma
iorpg ledichleichen haben gegeben mit allem dem recht als wir iz gehabt haben zwelf schilling
geldes die dienet ze posem siesidel ecker vnd ob yeman sie hernach ansprechen wolde vmb daz
vorgenant gut wer s(ie) des schaden nemen den schaden schul wir oder vnser gerben in abe legen
vnd daz dem haus ze Maiorperg vnd dem erben Conuent daz selb selgeret vnd vnser gabe von
vns vnd von vnsern gerben ewichleichen stet vnd vntzbrochen behalten beleibe des geb wir in di
sen prief versigelt mit vnsen insigeln hern weichartz von paumgarten vnd h(er)n Hainreichs meins
suns vnd h(er)n fridreichs meins suns vnd h(er)n chadoltz meins pruders von paumgarten Diz sint
gezeuge die erbern herren vnd die erben leut her ~alber~ von Bauchenstam vnser freunt mit seim insigel
pruder pehtold von Zeltza ze den zeiten maist(er) ze Maiorpg pruder fridreich von Maidburch pr(u)
der Hainreich von Schowmbeh p(ru)der Chonrat von Shizenbeh her dychmar vo(n) hadmarsdorf her
Gerung sein pruder Thomas der waser vnd ander erber leut den dise sach wol chunt ist diser
prief ist gegeben ze Maiorperg an sand Cholmans tag do von Christes geburt ergangen wa
ren dreyzehenhundert iar darnach in dem zwai vnd zwainzigesten iar