Ich alber von ottenstain vnd ich katrein sein havsfrowe vnd ich alber ir paider sun wir veriehen vnd tvn chvnt allen den
die disen prief lesent oder horent lesen die nv lebent vnd her nach chvnftich sint daz wir mit aller vnser erben gvtem willen vnd
ernst mit vedaechtem muet vnd mit gesampter hant zv der zeit da wir sy wol getvn mochten gegeben haben lavterleich dvrch got vnd dv
rch vnser vordern sel willen vnd avch dvrch vnser selbes sel hail vnsers rechten aigens ain halbez lehen dz ze thomestorf daz da dient fvnf
schilling phenning wiener mvntz daz zv den zeiten alber stemphel in nvtz vnd in geber het vnd ain holz ze pezental daz da haizet der ot
tenstainer holtz daz selbe halbe lehen ze thomestorf vnd daz vorgenant holtz ze pezental haben wir gegeben avf sant pangratzen alter in
daz gotzhaws datz harrez mit aigenschaft in alle also mit avz genomer red daz vlreich von pawngarten der da sitzet datz harrez vnd gotfrid
sein ochem datz harrez oder wer daz vorgenant halbez lehen vnd daz vorgenant holtz besitzet da von dienen schvllen ewichleichen alle Iar an
sant Iorgen tag avf sant pangratzen alter ze harrez von dem vorgenantem halben lehen sehs wiener phenning vnd von dem vorgenantem holtz
sehs wiener phenning ze rechtem pvrchrecht vnd chainen andern dienst mer vnd habent vns dar vmb gegeben der vorgenant vlreich
von pawngarten vnd gotfrid sein ochem vier vnd dreizzich phvnt wiener phenning der wir recht vnd redleichen gewert sein vnd dar
vber dvrch pezzer sicherhait so setzzen wir vns ich alber von ottenstain vnd ich katrein sein havsfrowe vnd ich alber ir paider sun vnd
ott von ottenstain sein prveder vnverschaidenleichen vber daz vorgenant halbez lehen vnd vber daz vorgenant holtz vnd vber div aigen
schaft des selben halben lehen vnd des vorgenant holtz ze rechtem scherm fvr alle ansparch dem vorgenant gothavs sant pangratzen datz
harrez als aigens recht ist vnd des landes gewohait ze osterreich wer aver daz daz vorgenant gothavs des ee genant aiges
chain schaden nem den schvllen wir im ab tragen daz loben wir gelaisten mit vnsern trewen vnd gegeben wir dem vorgena
ntem gothavs disen prief zv aim offen vrchvnde vnd zv ainem waren gezevg diser schache versigelten mit vnserm in
sigeln vnd sind avch des gezevg her gibot von patzmanstorf Rapot von patzmanstorf Rapot sein sun gotfrid von har
rez alber der pravnstorffer volker von zwingendorf hertnich von harrez dietmar der gmein vnd ander frvm levt ge
nvech den disev sache wol chvnt ist Diser prief ist geben do von christes gebvrt waren ergangen drevtzehen hvndert
Iar in dem zway vnd zwaintzigistem iar dar nach an sant thomas tag