Ich Alber von Pochenstain vnd Jch clare sein hausfraw vnd Jch Hartneit sein bruder vnd all vnser erben Ver Jehen
vnd tůn chunt alle den die disen prief sehen oder horen lesen daz wir mit bedachten müt mit gesamt hant mit vns(er) pesten
friwnt rät vnd mit vnser erben gütleichen willen ze den zeiten da wir es wol getůn mochten haben verchauft den erben H(er)ren vnd
dem hawze ze Mæilperch sand Johans orden vnser rechten aigen zehenthall phunt phenning geltz vnd siben vnd zwainzigiste
minz geltz wiener müntz die da ligent ze Næichartstorf auf drein lehen vnd auf siben hofsteten vnd alles daz dar zü gehort ze
velde vnd ze dorf besücht vnd vnbesücht mit alle dem rechte vnd wir ez gehabt haben die man dient alle jar halb auf sand
michels tag vnd halb auf sand Jorgen tag die hab wir in geben vmb hundert phunt phenning vnd vmb funfthalb phunt vnd
dreyzig phunt phenning wiener müntz der wir aller gäntz vnd gar bericht sein vnd gewert Vnd sülen den vorgenant(en)
H(er)ren vnd dem haus ze Mæilperch wir vnd all vns(er) erben vmb die selb gult rechten schirm fůr alle ansprach nach des landes recht
in ost(er)reich Vnd ob die selben H(er)ren des geltz dahain chrieg oder dahain ansprach gewunne swelhen schaden sie daz nemen in recht
ain sie gesagen mogen pey iren trewen den schult wir vnd alle vnser erben in ablegen nach des landes recht in ost(er)reich tůt wir dez
niht so schullen sie ez haben auf all vns(er)m güt vnd auf vnser erben güt daz wir haben in dem lande ze ost(er)reich Vnd swer ouch
ze den selben zeiten landes h(er)re ist in ost(er)reich der schol in daz geholfen mit vns(er)m gütleiche willen Vnd daz in die rede stæt
vnd vnzerbrochen bleib dar vber geb wir in disen prief besigelt mit meim Insigel vnd mit meins bruder Insigel dez vorgenant(en)
hartneits von Pochenstain vnd mit meins swæg(er) Insigel h(er)n Hainreichs von Půchhaim der mit vns ditz guets schirm ist mit seins
Insigel der auch mit vns stet vnverschaidenlichen an alle den gelubde vnd in alle den pinde als wir den H(er)ren ze Mæilperch gelobt
haben vmb daz vorgenante güt Vnd mit h(er)n Albn Insigel von Sünning vnd mit h(er)n Næidharts von Mistelbach Insigel vnd mit
h(er)n Weykharts Insigel von Winkel die diser sache gezeuge sein mit irn Insigeln diser sache ist ouch gezeuge h(er)r Symon
von Pefindorf h(er)r Hainreich von ymmendorf Vnd Hærman hætmer von Pefperch vnd andir erb leute genůc der dise sache
wol chunt vnd gewizzen ist der prief ist geben nach chryst gepůrt drevzehenhundert jar dar nach in dem drey vnd dreizzigiste
jare In dem perchtage