Ich chadt von Paumgarten vnd ich Leutolt sein sun vnd ich chadt von Wetzelsdorf vnd ich oet von Paumgarten vnd ich Wilhalm
sein pruder vnd ich Johans von clemens vnd ich seifrid sein pruder vnd all vnser erben Wir veriehen vnd tůn chunt allen den die disen
prief lesent oder horent lesen die nů leben vnd hernach chünftich sint Daz wir mit rechtem můt mit gesamter hant mit vnser
pesten freunde rât vnd mit vnser aigen gůtlichem willen zü den zeiten da wir ez wol getůn mochten haben zü chaufen geben den
erber herren vnd dem Hause zü Ræwrbach brůd Johans orden vnser recht aigen daz wir gehabet haben daz haws auf
ainem ganzen lehen daz tzů den zeiten von vns tzů lehen haben toffel von hartz vnd chůnrat von holtzpach vnd
auf vier hofsteten die zü den zeiten von vns tzů lehen hat gehabt wrolf von hartz vnd allez daz tzů dem lehen vnd
tzů den hofsteten gehort an veld vnd tzů dorf gesucht vnd vngesucht gestift vnd vngestift vnd wie so ez genant ist
mit alle dem recht vnd nůtz als wir ez gehabet haben vnd als wir ez in aigens gewer vnd in gewalt enha geantwurt
haben Daz hab wir in geben vmb achtzichalt phunt wiener phenning der wir gäntz vnd gar redleich vnd recht
berait sein vnd gewert an allez fürzue Vnd lůben dem vorgenanten herren vnd dem hause tzů Ræwrbach wir vnd all vnser
erben vmb daz selb aigen rechten schirm für alle ansprach nach des landes recht zü osterreich Vnd ob die egenanten herren
vnd daz haus tzů Ræwrbach des aigens dehain chrieg oder ansprach gewünnen swelhen schaden sie des an nemen mit recht den
sie wol beweisen mogen den schulle wir in abtragen als landes recht ist vnd aigens recht in osterreich Tůn wir des nicht so
schullen sie ez haben auf vns vnd auf alle vnsern gůt vnd auf alle vnser erben gůt daz wir haben in dem lande tzů oster
reich Vnd daz in die red stet vnd vngeprochen bleib dar vber geb wir in disen prief tzů ainem offen vrchůnde
diser sache besigelt mit vnser aller Infigel vnd mit diser vettern Infigel h(er)n Hæinreichs von Paumgarten vnd sei
leutolts seins pruder die des egenanten aigens gewer vnd schirm sint mit sampt vns vnd auch der sache getzeug sint
mit iren Infigeln Der prief ist geben nach christi geburt dreutzehenhundert Iar dar nach in dem viertzigistem Iare an sand
Petronell tag der hailigen Iuncvrawn