Ich Agnes fraw Gerharts dez Endresen witib von Erisprun dem got genad vnd ich Vlreich der Velebrunner ir aydem Vnd ich Ge=
draut sein Hawsfraw Vnd ich Jans der Veleprunner ir enenchel Vnd alle vnser erben Wir biche(n) vnd tun chunt alle den die di=
sen prief lesent oder horent lesen daz wir mit vdachte mut mit gutleichem wille(n) mit vnserm pesten frewnt rat zu den gerte(n)
da wir ez wol getun mochte(n) vnnschaideleich vnd mit gesampte(r) hant chauft habe(n) den erbn gaistleichn h(er)ren sand Johans orde(n)
vnd dem Haus zu Genvs vnsers rehte(n) aygens vierdhalb phunt wiener phenig gelte(s) an zwen vnd zwainzich phenig die da
ligent da zu Haslach auf vierdhalbe(n) lehe(n) vnd auf ainer hoffstat vnd man sie dient halb auf sand Jorgen tag vnd halb auf
sand Michels tag die habe(n) wir in gegebn zu veld zu dorf gestift vnd vngestift v(er)sucht vnd vnu(er)sucht swie so daz genant
ist mit allem dem reht vnd nutz als wir vnd vnser vodern daz selbe gut in aygens gewer her pracht habe(n) vmb vier vnd
vierzich phunt vnd vmb vier vnd sibenzich phenig wiener munz der wir reht vnd redleich gentzleich vnd gar bricht vnd
gewert sein Vnd zu pezzer sicherhait so setz(e) wir vns Ich vorgenante Agnes Vnd ich Vlreich ir aydem Vnd ich Gedraut sein
Hawsfraw Vnd ich Jans der Veleprunner ir enenchel vnd alle vnser erben vnschaideleich mit gesampter hant vmb daz selbe gut
zu scherm vnd zu gewer als aygens reht ist vnd dez landez reht in ostirreich Vnd ich Jans der Veleprunn(er) besunder nim mich
an fur alle mein geswistreid paide man vnd vrowen die mit sampt vns vnschaideleich schulle(n) scherm vnd gewer sein dez vor=
genante(n) guts Vnd auch mit sampt vns schulle(n) in alle gelubd sten als vor vnd her nach gescrib(e)n stet Vnd wer ob die vorgenante(n)
h(er)re(n) vnd daz Haus zu Genvs dez egenante(n) guts chain ansprach oder chrieg gewunnen swelichn schade(n) sie dez mit reht neme(n)
den sie wol beweisen moge(n) den schulle(n) wir in abtrage(n) gentzleich vnd gar an alle wider red tet(e) wir daz nicht so schulle(n) sie
ez habn auf vns vnd auf alle vnserm gut vnd auf vnserm erb mit vnschaideleich daz wir habe(n) in dem lande zu ostirreich
wir sein lemtig oder tot Vnd daz dise red stet vnd vngebrochn beleib dar vber geb(e) wir in disen prief zu aine(n) waren
gezeug diser sach v(er)sigelt mit vnsern anhangenden Insigeln dez vorgenante(n) Vlreichs dez Velebrun(er) Vnd Janss dez Veleprun(er)
vnd wan ich vorgenante vrow Agnes chain aygen Insigel selbe(n) nicht han Vnd mit der erbn lewt Insigel Vlreichs dez chne=
ches Vnd ote dez Greiffenstainer die diser sache auch gezeug sint mit irn Insigeln Der prief ist gebn nach christi gepurt
dreutzehnhundert iar dar nach in dem drei vnd funfzigiste(n) iare dez Eirtags an sand Elsbeten tag :: :: ::