Ich pruder Judas von Wildungsmäur zu den czeiten Maister zu Mäurperg und der gancz conuent gemain daselbe
wir veriechen und tün chunt offenleich an disem brieff allen den die in lesent sechent oder horent lesen daz der
Erber man Hainreich der Dobrencz uns und unserm gotzhaus zu Mäurperg sand Johans orden gegeben hat an
zweliff phenning zway phunt geltz aygens guetz die gelegen sint ze Wenczestorff auf vier gestifften lechen
und auf aim uberlent lechen mit allen den nuczen und rechten als er iz in aygens gewer her pracht hat also weschay
denleich daz wier im und seiner hawsfrawen vrowen Elspeten selig und allen seinen vordern alle iar do von begen
schullen ein iartag an dem achten tag nach sand Jorgen tag des nachtes mit der vigilig des morgens mit gesange ains
sellampt also daz man des vorgenanten geltz schol alle iar zu ygelichen iartag opfern auf sand Johans alter czechen
schilling phenning und schol man von den ubrigen phenning geben dem prior zwainczig phenning dem schulmaister
zweliff phenning und vier priestern ygeleich sechs phenning dem osner von dem leuten sechs phenning und die
ubrigen phenning schol man gewen arm lewten der wiert ayn und vierdhalben schilling und weliches iar daz wer
daz wier den vorgenanten iartag nicht begiengen als vor geschriben stet so schol der vorgenant Hainreich der
Dobrencz oder seiner erben die vorgenanten nucz von dem selben iar und man d^?^ versaumt hiet in
vessen mit unserm guetleichen willen und schullen den geben zu einem andern g^?^ on vorlust und ob
daz wer daz wier den selben iartag des Jars des iars und wier den versaum^?^ ander iar hin wider
begiengen und wider volfürten daz wir versaumpt heten so schulle wir die vorgenanten nucz und das gelt
wider in nemen und gewaltig sein zu gleicher weizs als vor an allen chrieg und das disew sach also stet
und unczebrochen beleib dar uber so gib ich vorgenanter bruder Judas von Wildungsmäur Maister czu Mäurperg
disen brieff vorsigelt mit meinem anhangunden insigel und mit pruder sighartz insigel zu den czeiten prior
czu Mäurperg und mit bruder Otten Jnsigel des Toczenpechen zu den czeiten Comentew zu harras die diser
sach zewg sint mit iren Jnsigeln Der brieff ist gegeben nach christes gepurde dreuczhenhundert iar dar nach
in dem acht und fumczigist iar an sand Thomas tag