Ich Seyfrid der chnerr und ich Jans und Albrecht sein sün, und ich Wilhalm von hochungstorf
und all uns(er) erben wir verjehen offenlich an dem brief daz wir mit all(er) uns(er) erben gutem
willen und gunst mit verdachtem mut und auch ze der zeit da wir es mit reht wol getun
mahten, reht und redlich verchauft haben die aigenshaft, di wir gehaubt haben auf dem
ganczem lehen, gelegen ze dem chadelis bey Seveld, da ze den zeiten Eit d(er) spitaler
auf gesezzen ist, und daz er von uns ze lehen gehaubt hat. Dieselben aigenshaft haben wir
verchauft und geben umb sehs phunt wienn(er) phennig, der wir gar und gancz richt
und gewert sein, dem wirdigen h(er)ren p(r)uder Nyclasen von wildungsmäur maister
ze stämpelg und ze den zeiten comitour dez haws sant Johans gelegen in der
chärnerstrasz ze wienn im und allen seinen nachkomen, die auch im maister ze stämpelg
werden, furbas lediglich und ewiclich ze haben und allen iren frumen damit ze schaffen
verchäuffen verseczen und geben wem si wellen an allen unval. Wir sein auch unschai=
denlich mit sampt uns(er)n erben der egenanten aigenshaft ir reht gewer und schirm fur
alle ansprach, als aigens reht ist, und dy landes reht in Ost(er)r(eich) hat in furbas dar
an ist ab mit reht oder ob si mit reht icht chriegs od(er) ansprach dar an gewunnen
von swem daz wär daz sullen wir in alles aufheben ablegen und widsagen an all
ir chost und schad(e)n an allen iren schaden und sullen si daz haben auf uns unnschaiden=
lich und auf allem uns(er)m gut, daz wir haben in dem land ze Ost(er)r(eich) od(er) wa wir
daz haben wir sein lebentig od(er) tod. Daz der chauf furbas also stät sei und ungebrochen
beleibe, daruber so geben wir in den brief ze ainem offen urchund, der ist versigelt
mit uns(er)n Insigeln. Der brief ist geben ze wienn nach christs gepurd drewzehn
hundert jar, darnach in dem funf und sechczigistem jar, an dem phincztage
vor sant Antony tag.