Ich Jmfrid der clemens vnd ich Jans vnd Albrecht sein svn vnd all vnser erben. wir vergehen offenleich
an dem brif daz wir mit aller vnser erben guten willen vnd gunst mit verdachtem mut vnd auch
zu der zeit da wir es mit recht wol getun mochten Recht vnd redlich verchauft haben di aigenschaft
di wir gehabt haben auf eim behausten halben lehen vnd auf eim halben lehe vberlend gelegen daz
Czwengendorf hin disseit der goulea daz zu den zeiten gewesen ist Remprechtz von ffridbicz daz er vo(n)
vns ze lehen gehabt hat dieselben aigenschaft haben wir verchauft vnd gegeben vmb drei phunt
weiennerphennig. der wir gancz vnd gar verricht sin gewt sein dem Erberdigen h(er)ren pruder Nuchlasen von
wildungsmans maister zu Mairpeng. im vnd allen seine(n) nachkomen die nach im maist(er) ze mairpeng
werden furbas ledichleich vnd vreileich ze haben vnd allen irn frumen da mit ze schaffen verchauffen
veczen vnd geben wem si wellen an allen irsal. wir sein auch vnuschadenleich mit sampt vns(er)n erbe(n)
der egenanten aygenschaft ir recht gewer vnd schirm fur alle ansprach als aigens recht ist vnd des lan
des recht in ost(er)reich Get in furbas dar an icht ab mit recht oder ob si mit recht icht chrieges od(er) ansprach
dar an gewunnen von wem daz wer daz sullen wir in alles ausrichten ablegen vnd ververtigen an
all ir mu vnd auch an allen irn schaden vnd schullen si daz haben auf vns vnuschadenleich vnd
auf allem vnserm gut daz wir haben in dem lant ze ostereich oder wo wir daz haben wir sein
lebentig oder tod. Daz der chauf furbas also stet sei vnd vnzebrochen beleibe daruber so geben
wir in den brif ze einem offen vrchund der sach versigelten mit vnsern Jnsigeln Der brif ist gege
ben nach ch(ri)ste geburd dreuczehen hvndert Jar dar nach in dem acht vnd sechczigesten iar An
sand vlriches tag