Ich pruder Niclas von wildungsmaur ze den czeiten Maister zu Mänperg vnd der convent gemain
wir ver-gechen vnd tun chunt offenleich an dem brif das vns ein erber man geschafter hat der da
gehaissen hat der czäch phlipp achzchenthalb phunt wiener phennig da man . chäuffen scholt ain
erb dar vmb seiner sel ze ainer ebigen gedechtnus nu hab wir gechäufft ain phunt geltes auf ainem
halben lehen daz da leit dacz dietessenhoven vnd von dem selben phunt geltes schol man dem haus ze
Mänperg dienen alle Iar zwen vnd dreizzich phenning vnd nicht mer auf sand Iorgen tag vnd di
vbering phennig da-sint an zwen siben schiling di schol man dinen sinem nähistem erben alle Iar
dem eltistem vnder irem geslecht der schol dan nach ander seiner freunt rat alle Iar der sel da von
gedenchen vnd ir ettewas gutes tun wie si daz aller pest dunchet alle Iar di phennig geraichen
mugen wir der lauben in auch nicht daz si das selb gelt auf chain ander goteshaus geben mugen
den daz sie selb in haben sullen wir loben in auch daz wir das selb guet mit chainen andern
sächhen geswern schullen den alls vil ob der hertzog im land oder sein amvalten von vnsern guet
tern icht nemen wolten da mug wir si nicht vür geschuczen da mus daz halb lehen alls vil leiden
alls ein anders halbs lehen daz wir haben in dem land vnd das di red furbas stet vnd gancz vnd
vngebrochen peleib dar vber so gib ich in disen brief ich egenanter prud(er) Niclas von wildungsmaur
maist(er) ze Mänp(er)g mit meim an hangundem insigel vnd mit des erben herren in sigel prud(er) hanse
des prior da selbs der prief ist geben nach christo gepurd dreiczehen hundert Iar dar nach
dar nach in dem ain vnd sibenczigisten Iar an sand Laurenczen tag :-