Ich Fridreich der Paretz vnd ich Vrsula sein Hauswrowe chunrades tochter von Hakenwerch wir
ver iehen vnd tun chunt offenleich mit dem Prief daz wir mit gutem willen vnd mit verdachtem
mut ze der czeit do wir es wol getan mochten Recht vnd redleich verchauft vnd geben haben den erban
Gaistleichen herren Prueder Andreen von wildungsmau ze den czeiten Maister ze Nawnpg vnd dem conuent
gemain da selbs vnd allen iren nachchomen vnsern akcher des Seebachen gewanten sint gelegen in dem
weisteet den wir von den selben Gaistleichen herren ze Purchrecht gehabt haben mit allem dem nucz vnd
rechten alls wir den selben akcher in Purchrechts recht vnd gewer her pracht haben vmb czwai vnd drey
zig phunt wiener phennig der si vns gancz vnd gar beraicht vnd gewert haben also das si vnd all ir nach
komen den vorgenanten akcher sullen furbas ledichleichen vnd freileichen haben vnd allen iren frume da mit
ze schaffen verchauffen ver seczen vnd geben wem si wellent an allen irrsal vnd su wir obgenanten Ich
Fridreich der paretz vnd ich Vrsula sein Hauswrow vnnerschaidenleich des selbn akchers ir Recht gewern
vnd schirm fur alle ansprach als Purchrechts recht ist in dem land ze Osterreich wer aber daz si furbas mit
recht an dem egenanten akcher icht chrieges oder ansprach gewunnen von wem daz wer waz si des schadn
nement das sullen wir in alles aufrichten vnd widerchern an allen iren schaden vnd sullen si auch daz ha
ben auf vns vnnerschaidenleich vnd auf allem vnserm gut das wir haben in dem land ze Osterreich
oder wo wir es haben oder noch gewunnen wir sein lebentig oder tod vnd das der chauf vnd di
red furbas gancz vnd stet vnd vngeprochen peleib dar vber so geb wir den egenanten Gaistleichen
Herren disen Prief ich egenanter Fridreich der paretz mit meim anhangundem Insigel vnd ich Vrsula
sein Hauswrow ver pint mich alles des stet ze haben daz hie an dem Prief geschriben stet vnder meines
mannes Insigel vnd auch mit der paider erbern Insigeln Jansen des Purger vnd Fridreichs des
Tmchenhaimer auch mit iren anhangunden Insigeln di diser sach geczeug sint in vnschaden der Prief
ist geben Nach christs gepurt dreuczehenhundert jar dar nach in dem czwai vnd sibenczigisten jar
an sand agnesen tag