Wir Prueder Otte ze den czeiten Comdewer vnd die prueder ze dem Dævtschen haus ze
wienne vergehen vnd tven chvnt allen den die disen prief lesent oder horent lesen die
nv lewent oder her nach chunftich sint daz ein chriech was enzwischen vns an ainem tail
vnd enzwischen prveder Iohansen von Bosenstain ze den czeiten Comdewer der prueder ze
Morperig vnd ze wienn an dem andern tail vmb ain phvnt geltes pvrchrechtes daz man
vns weilen gedient hat von einem haus daz ze den czeiten verprvnnen was vnd daz gele
gen ist in der schef strazz vnd ze nachst Albrechten dem fverer daz selb phvnt geltes iahen
wir daz solten vns die vorgenanten herren dienen von irem havs zewienn daz da leit in
der Chernerstraz datz sand Iohans des iahen sev vns nicht vnd sprachen wir solten daz vor
genant phvnt geltes pvrchrechtes mit samt in haben auf der e genanten prantstat in der
schefstraz der sie recht Gvntherren weren var vns mit einem halben phvnt grvntrech
tes daz man in var vnser da von diente den selben chriech hezzen wir paidenthalben
mit gvetem willen vnd mit gvnst vnserr prueder paidenthalben vnd mit rechter fversp
eht genglich an die pvrger des rates ze wienn di beschieden iz also daz vns di vorgena
nten herren von Morperig vnd die herren datz sand Iohans ze wienn solten gewen fvmf march
silber der wir recht vnd redleich gewert sein vnd solden fvrwaz mit der e genanten
prantstat in der schefstraz allen iren frvmen schaffen als iz in aller peste chom vnd fveg
nah allem irem willen vnd sollen fvrwaz von vns gar vnd genczlich ledich sein des vor
genanten phvntes pvrchrechtes ze dienen vnd daz disev schidung fvrwaz stet vnd vnge
brochen beleib dar vber so gewen wir den vor genanten herren von Morperig vnd
ze wienn datz sand Iohans vnd allen iren nachchomen disen prief ze ainem sichtigen
vrchunde vnd ze einem waren gezevgse diser sache versigehen mit vnserm insigel
vnd mit hern Otten insigel des wolfleinstorffer ze den czeiten pvrgamaister ze wienn
der diser sache gezevg ist mit seinem insigel mit samt dem rat zewienn Diser
prief ist gegewen ze wienn do von christes gepvert waren ergangen Drevczehenhvn
dert iar dar nach in dem Nevnczehenden iar an sand Pangreczen tag