Wir bruder Leupolt zu den zeiten Abt ze dem Heiligen Chreutz und der Conuent Gemaine des
selben Goteshauses Veriehen und tun chunt allen den die disen brief lesent oder horent lesen die nu lebent
und hernach chunftich sind Daz wir mit gutem willen mit verdachtem mut und mit Gemainem Rat unsers
Conuents zu der zeit do wir es wol getun mochten Verchauft haben unsers rechten Aygens die Aygenschaft
die wir gehabt haben an des Edeln herren hof Graf Otten von Sternberch der da lit ze lach ze nachst an
valden dem murren und ainlef schillinge wienner phenninge geltes die uns worden sint von Wilhalm in dem Grueb
dem Got genade Die Aygenschaft des selben hofs und die ainlef schillinge wienner phenninge geltes haben wir
recht und redleich verchauft und geben mit alle dem nutz und recht als wir es alles in Aygens und in pruch
rechtes gewer her pracht haben umb Achtzehen phunt wienner phenninge der wir gar und gantz gleich gewert sein
Dem vorgenanten Edeln herren Graf Otten von Sternberch und seinen erben furbas ledichleichen und
freyleichen ze haben und allen irn frumen da mit ze schaffen verchauffen versetzen und geben swem si wellen an
allen irrsal Und sein auch wir und alle unser Nachchomen der Aygenschaft des egenanten hofs und der ainlef
schillinge wienner phenninge geltes da auf ir recht gewern und schirm fur alle ansprach als Aygens und
purchrechtes recht ist und des Landes recht ze Osterreich Wær aber daz In mit Reche dar an Icht ab
gienge daz schuln si haben auf uns unuersehendenleich und auf dem Gut daz zu unserm Chloster gehoret swie
so daz genant ist Und daz diser chauf furbas also stæt und unzerbrochen beleibe Dar umb so geben wir
In disen brief zu einem wærn bichtigen urchunde und zu einer ewigen vestnunge diser sache versigilten mit unser
baiden anhangunden Infigiln Diser brief ist geben ze wienne nach Christes geburde dreutzehen hundert iar dar
nach in dem Sechs und Viertzigisten iar An Sant Ulreichs Abent