Ich Andre zu den zeiten Zechmaister der pharrchirchen ze Leubendorf . vnd ich Herbart von diestorf . vnd ich Ote der Amman
von Vorbach . vnd ich Hert von Ekkelsperge alle drei pharrleut ze leubendorf . vnd wir dev gemain der pharrleut ze Leubendorf
Vergehn vnd tun chunt Allen den die disen brief lesent oder horent lesen die nu lebent vnd hernach chunftich sint Daz wir mit gu
tem willen mit verdachtem mut vnd mit Gemainem rat . zu der zeit do wir ez wol getun mochten Verchauft haben vnsers recht en
diguns . an Sechs phenninge Sechs schilling wiener phenninge geltes Purgrechtes . die vns die erbern gaistleichen herren des Haus ze
Loch sant Johans orden gedient habent in vnser Zech ze Leubendorf . von dem gut gelegen ze waldorf . daz si gechauft habent
von dem erbern Priester hern Hainreichen dem Padner . Die selben Sechs schilling geltes an Sechs phenninge . haben wir recht vn
redleich ab ze losen vnd ab ze chaufen geben den erbern gaistleichen herren Pruder Chunraten von Hanspach zu den zeiten Co
miteur des Haus ze loch sant Johans orden . vnd den prudern gemain des selben Haus . vnd allen irn nachchomen . mit alle den
nuzzen vnd rechten als wir die selben gult her pracht haben . vmb Acht phunt wiener phenninge dev si vns gar vnd gancz zleich
gewert habent Also daz si der herr die vorgenanten gult . inne hat vnd besiczet . der selben Sechs schilling geltes an Sechs
phenninge suln si vrbiz ab den vorgenanten irn gut Aller dinge ganczleich ledich vnd vrei sein vnd da von nicht mer ze dienen
Vnd sein Auch wir vnd die pharrleut gemain ze Leubendorf . der vorgenanten Sechs schillinge geltes an Sechs phenninge . dev
erbern gaistleichen herren gemain ze Loch vnd irn nachchomen Recht gewern vnd schirm fur alle ansprach nach des Landes reht
ze Osterreich . Vnd dar vber so gib ich vorgenanter Herbart von diestorf . in disen brief zu einem warn vrchunde . vnd zu einer
ewigen vestnunge diser sache versigilt . mit meinem Insigil . vnd mit des erbern herren Insigil hern Chunrates von Chreigch zu
den zeiten Purgraf auf den Greuzzenstain . vnd mit hern stephans Insigil zu den zeiten pharrer ze Leubendorf . nach der
Rat diser chauf gewandelt vnd geschehen ist . vnd die Auch diser sache gezeuge sint . mit irn Insigiln . vnd verpinden Auch
wir vns . ich vorgenanter Andre der Zechmaister . vnd ich Ote der Amman von Vorbach . vnd ich Hert von Ekkelsperge . vnd wir
die gemain der pharrleut ze Leubendorf . mit vnsern Treuwen vnder der egenanten Insigil alles daz stæt ze haltn vnd ze laisten
daz vor an disem brief geschriben stet . Der brief ist geben ze wienne nach Christes geburt Dreuczehen Hundert jar . dar nach
in dem Sechs vnd funfczigsten jar . des nachsten manetages vor dem Palm tage . : )