Ich Jans der Gneuzzer ze den zeiten Statrichter ze Wienne Vergich offenlich an disem brief daz fur mich cham an die prugk
schranne ze Wienne do ich saz an offem Gerichte der Erber man Wilhalm ze den zeiten Schaffer des hauses daz sand
Johanns gelegen in der Chernerstrazz ze Wienne vnd chlagt mit vnschulden an seiner herrn stat vnd auch an des
selbigen haws stat daz sand Johanns auf Jansens haws des Schuster gelegen in dem Gänch bey Werdertor ze Wienn
ze nähst Gotfrides haws des Chursner vmb Acht vnd dreizzig wienn(er) phenning versezzens purkrechtes vnd vmb
alle di Gwissel di mit recht dar auf Erteilt vnd gegangen sind Als war daz ich Jm aine(n) Recht poten dar auf gab
michaln den Schrannler vnd Pemein den statchlain di Jnen vnschulden di habent mich dar vmb gesagt mit Jm trewn
vor offem Gerichte daz Si daz obgenant haws mitsampt den vmbsezzen haben beschawe vnd geschazt daz es p(e)zzer vnder
weist als das versezen purckrecht vnd alle di Gwissel di mit Recht dar auf erteilt vnd gegangen sind vnd ward
geurttailt was Recht wär do ward Erteilt vnd geuil auch an den obgenanten Wilhalm mit vrtail vnd mit
Recht Er solt mir mein Recht geben daz hat Er getan Vnd solt ich di obgenanten erbn(n) bescheyden herren vnd auch
das haws daz sand Johanns des obgenanten haws gewaltig machen vnd an di Gwer seczen daz han ich auch getan
fürbas ledichleichen vnd vailachen ze haben vnd allen Jm frumen da mit ze schaffen verchawffen versezen vnd geben
swem Si wellen an allan irrsel Vnd solt ich Jm des mein Vrchund geben Vnd des ze vrchund so gib ich Jm disen
brief versigelt mit meinem Jnsigil der Geben ist ze Wienne Nach christi Gepurd dreuzehen Hund(er)t Jar
dar nach in dem Acht vnd fumfzigistem Jar des nähsten samztags nach sand Jacobs tag