Ich Hanns von Svnnbarch vergihe fur mich vnd fur alle mein erben vnd tun chunt allen den die den brief lesent oder horent lesen
daz ich mit meiner erben gutem willen vnd gunst mit verdachtem mut vnd nach rat meiner nachsten frewnt zu der zeit do ich
es wol getun mocht verchoufft han mein haws gelegen in sand Johanne strazz ze Wienne zenachst Michels haws des peksien
vnd ein halb phunt wienner phenning geltes daz man in daz vorgenant mein haws dient von einem chleinen hawslein gelegen
zwischen demselben meinem haws vnd des egenanten Michels des peksien haws vnd dazselb mein haws mein vater her Alber
von Svnnbarch selig vnd her chrystan der torer miteinader choufften vnd do gab derselb torer allen seinen tail den er dar in
het mir vnd meinem pruder fridreichen von Svnnbarch seligen vnd do ist mich von demselben meinem pruder aller der tail
den er an demselben haws gehabt hat angeerbt vnd anerstorben dazselb haws daz ledig ist vnd nihtes dient weder gruntrecht noch
purchrecht han ich mitsambt dem egenanten halben phunt geltes daz man dar in dient recht vnd redleich verchoufft vnd geben
mit allen den nuzzen vnd rechten als ich es vnuerprochenleich in purchrechts gewer herpracht han vmb funfzig phunt wienner
phenning der ich gantz vnd gar gewert pin meinem oheim pernharten von hawspach vnd seinen erben stetich ledichleich vnd frey
leich zehaben vnd allen irn frumen damit zeschaffen verchouffen versetzen vnd geben wem si wellen an allen irrssal vnd pin ouch
ich egenanter Hanns von Svnnbarch vnd alle mein erben des vorgenanten haws vnd des halben phunt geltes daz man dar in
dient des egenanten meins oheims pernharts von hawspach vnd seiner erben recht gewer vnd schirm fur alle ansprauch als
purchrechts recht ist vnd der stat recht ze Wienne wer aber daz in mit recht dar in icht abgieng oder ob si mit recht icht chriegs
oder ansprauch dar in gewunnen von wem daz wer swaz si des schaden nement daz sullen wir in alles ausrichten vnd widerchern
an allen irn schaden vnd sullen si daz haben auf vns vnd auf allem vnserm gut daz wir haben in dem lannde ze osterreich oder
wo wir es haben wie daz genant ist wir sein lebentig oder tod vnd daz der chouf stetich also pleib vnd vngebrochen beleib dar
uber so gib ich obgenanter Hanns von Svnnbarch fur mich vnd fur alle mein erben dem vorgenanten meinem oheim pernharten
von hawspach vnd seinen erben den brief zu einem warn vrkund der mit versigelt ist mit meinem Insigel vnd mit meiner oheimen
Insigeln Hannsen von gowgaw enders druchssezzen in osterreich vnd vlreichs von eberstorf die des auch gezeugen sint mit
irn Insigeln der brief ist geben ze Wienne nach christes gepurt drewtzehenhundert iar darnach in dem sechss vnd sybentz
igistem Jar des nechsten sambztags vor anntennisten