Wir Ratmanne der Stat Breslow bekennen vnd tun kund offentlichin mit desem briue allen die In sehen ader horen lesen das vor
die Ersamen weisen vnser mitratmanne die Im nestvorgangen Jare an Stats stat gesessen haben am tage des heyligen sinte Peters
ad cathedram komen seyn mathis filcz mit seynen kindern Sonen vnd Tochtern nemlichen Nickeln vnd Valentino Juncfrawen Annan vnd
Barbaran die zubeygenwortig stunden mit demselben mathis filcz Irem vater vnd vormunden vor sich vnd in macht vnd von wegen frawen
Margarethan des egnanten mathis filczes Eldesten tochter der egnanten kinder Swestir die zu loblyn wonet vnd haben alle eyntrechtig
lichen bekant das die wirdigen Andachtigen Peter prior vnd Conuent des hawses allhie zum heyligen leycham der Crewcziger des or
dens sand Johannis von Jerusalem von In das forwerg zum herdan gelegen mit aller seyner zugehorunge nemlichen dritthalber huben
das dieselben prior vnd Conuent den vorgenanten mathis filcz vnd seynen kindern Sonen vnd Tochtern vorsatzit hatten gancz vnd al
lenthalben wider gelost vnd gefreiet haben vnd von sulcher vorsatzunge wegen von den mitgnanten Priorn vnd Conuent volkomliche
lozungunge vnd beczalunge entpfangen vnd haben dieselben Herren Priorem vnd Conuent von sulcher gescheener abelozunge
vnd ganczer beczalunge desselben forwergkis zum Herdan mit seyner zugehorunge gancz queit los vnd ledig gesagt vnd haben glo
bit vor sich vnd Ire erben sunderlichen von der egnanten Margarethen zu loblyn Wegen vnd in macht derselben das die vorgenan
Prior vnd Conuent zum heyligen leycham von des mitgnanten forwergkis wegen zum Herdan vnd seyner zugehorunge vorbasmer
nymmer sullen angesprochen werden durch sich noch andere geistlich noch werclich noch sust in keynerweyße vnd haben sunderlich
globt das sie vonder egnanten frawen Margarethen zu loblyn gancze folle macht breyngen wellen das sie alle vnd igliche obge
schrebene bekentnis vnd artikel gancz stete haben sal vnd vorwillen vnd sich aller ansproche desselben forwergs vnd seyner zu
gehorunge kegen den egnanten Herren Priorn vnd Conuent vorzeyhen durch Iren vormunden vnd des bestendige queit bri
fe vnd kuntschafft allher schicken vngeferlichen vnd an arg vnd des zugeczugnis haben wir vnser Stat Jngesigil an desen
brieff lossen hengen Geben am heyligen ostirobende Nach cristi geburt vierczehenhundert vnd dornoch in dem ffunffvndsech
czigisten Jare