Ich Sygemud hertel brud(er) des ordens s(anct) Joh(annis) von iherus(alem) vnd Comp(tur) des hawßes züm
Heilige(n) leichna(m) zu breßlaw Bekenne offe(n)tlich yn disem briffe alle(n) dy en zehu(n) horen ader leze(n)
das vor mich kome(n) ist linhart dithman vnd vrsula zeyne geborne swest(er) vnd habe(n) beka(n)t
das sy gekoufft habe(n) recht vnd redelich vff Czezigen der dy alde scholginne hot zum
newdorff j m(a)r(c)k zinsse vmb x m(a)r(c)k hell(er) off zeynem morgen der do gelege(n) ist
czwisschen bartels vnd hanoss rudels erben do von glombu(r)g d(er) egena(n)te Czezigk
vor sich vnd vor zeyne rechte geerben vn(d) nochkomelinge dem vorgedochte(n) linhart
dithma(n) vn(d) vrsula zeyn(er) gebornen swest(er) add(er) den dy en von erentwege(n) add(er) noch
en komende mit dissem briff wis manen zu gebe(n) j m(a)r(c)k zinsse vnd nu off
michael nestkomede anzuheben j m(a)r(c)k vnd off walpu(r)g(is) dor noch dy and(er) halbe
m(a)r(c)k vnd also fort alle jor off dy egedochte zeit vnd tage bey d(er) pfendunge mit den
pfand(en) zu thun vnd czu lozen ap sich alle zechst dorober irgange(n) hetten vnd ap sy
nicht pfant(s) bekomen zo mogen sy en berechten wo sy en adder seyne erbe(n) add(er)
nochkomelinge obirkomen dach mit sulcher massigent wen is d(er) obgedochte Czezig
add(er) erben vnd rechte nochkomelinge vormogen zo sal man yn gunnen dy
selbige margk zinsse wider abczulozen vmb x m(a)r(c)k hell(er) vnschedelich den
vrsessen zinssen vnd ouch meyn(en) erbezinsse(n) vnd rechte(n) des zu orcu(n)d
sicher(er) urkunthniss habe ich obgedocht(er) Comp(tur) meyn Jngesigel vndenan
an dissen briff hange(n) lozen der do gegeb(en) ist am motage vor margareth(e)
Noch Cristigebort 1481