Wir Ratmanne der Stadt vonn kuniglicher gewaldt von Behemen haldenn unnd vorwesend die haubtmannschafft zu Breßlaw
bekennen unnd thun khunt offentlich mit disem brieff vor ydermenniglich das vor uns unnd den Edelen Hanns
Falsch Dipprandt Reybenicz Herman Falkenhain Georg Czirn Heinrich Haugwitz Kunczel Czirn Albrecht
Sack unnd Nickel Jenkwicz unser gnedigenn herrn kuniges vonn Behemen man Im gehegten dinge do der Erbar
Melchior kordendorff unser geschworner vonn unsern wegen das gerichte besas Urtel unnd Recht gebenn hat Ob
Als der wirdige herre Cuntze olim heiligen leichnam allhir czu unse Recht sagenn uffgebottenn hat wie Recht
ist das gut unnd dorff Bogenfeldt In dem Breßlysschen gebiete gelegenn Ob ymandis czinß brieffe
schulde oder ander czusprache dorczu hette oder habenn mochte Das er die bynnen Iar unnd tage Rechtlichunge
unnd sin Recht nicht vorsweige Eher die gewehre auß geht Wenne wer Iar unnd tage sweiget der sweiget
sin Iar unnd Besucht er dasselbe Iar unnd tage unrechtfertigende So mag er das furdernn besuczen genyssen
gebrauchenn Unnd sinenn bestenn nucz unnd fromenn dorutte schaffenn Nach laute der aldenn brieffe doruber
czuglich vonn Rechtiswegenn Dasselbe Urtel unnd alles das vorgeßchriebenn stehit habenn wir stete und gancz
unnd bestetigenn das vonn kuniglicher gewaldt vonn Behemen der wir gebrauchgenn mit dem kuniglichen
Inngesigel der Landtleuthe des furstenthumbs czu Breßlaw Dasto ist czu urkund unnd czugknus Unnd an disenn
brieff gehangenn Gebenn czu Breßlaw am Mitwoch Nach dem Sontage Iudica Nach Cristi gepurdt funfftzehn
hundert dornach Im achtzehndenn Iare Dobey sin gewest die Edelnn so obengeschriebenn stehin Unsers gnedigen
herrn kuniges vonn Behemen Mann Unnd Bernhardt nucz statschreiber unsser obgenanten Ratmanne
unnd gemeiner Stadt Breßlaw Canczley schreiber der disenn kegenwertigenn brieff gehabtt hat In befelhunge