Wir Jhan Herze vonn Warttembergkh Obrister Maister des priorats Im künigreich Behaim auff Strakonitz
Entbietenn dem Wirdigenn unnd andechtigenn Herrnn Michael Mungner seinem mitbrüeder beieder
liebe lieb unnd gruest in dem Herrnn Unnd demnach wir vor etlicher zeit bericht entpfanngenn durch
den Oberstenn zue Rodis wie ir euch anndens dann der gebür gemes sollet verhaldenn Darauff unns gedachter
Oberster zue Rodis beuolhenn dar Inn ein sehung zuepflegenn Unnd weil wir nun befindenn das ir hieran
zue unschuldenn angebenn So habenn wir auch den gefasstenn unwillenn wider euch fallenn lassenn unnd
sindt des halbenn unnd anndernn ursachenn mer auch in erwegung eures verheltnuss beweget wurdenn
Euch das Haus unnsers Ordenns alda zue Bresslaw zueuerleihenn Verleihenn euch dasselb hiemit
unnd in krafft dises unnserm brieffs Also das euch allen desselbenn Ordenns hab unnd güeter Unnder
windenn sollet unnd möget Demselbenn treulich vorzuesteenn mit beuelh auch das Regiment darinn
tun hauses einkomenn unnd geniessenn unnd sonnderlich sey meniglich der Im Haus itzundt ist oder
hernachmalenn dar Inn sein wirt bey den höchstenn pflichtenn unnd aidenn auferlegt gemeltem
Commendori gehorsam zuesein unnd alles das Ienig uebenn zue zue thun das des Ordenns unnd sein
eher nutz unnd gedey ist Idoch wollenn wir hiemit auch an unnsenn rechtenn priuilegion unnd
begnadungenn der uisitacion so wir auf von schaffenn des oberstenn zue Rodis gethon dergleichen ex
emption unnd anndernn eürenn priuilegionn nichts benomenn noch drogirt sonnder dieselbenn
hiemit unnd in krafft dises unnserm brieffs bestettigt unnd Confirmirt habenn wollenn unnd wil
men das Ir dabey gehaldenn unnd gehanndthabt werdt Alles in guetenn treüenn unnd one geuerde
des zue botten unnd vester haldung habenn wir unnsers priorats Innsigel mit wissenn unnd rath
unnser brüeder an disenn brieff henngenn lassenn Der gebenn ist zue Bresslaw den siben unnd
zwaintzigstenn tag des monats Februarij nach Christi geburdt funfftzehennhundert unnd Im
Achtunnddreissigstenn Jare