Wir Przemislawe von gotis gnadin hirczog czu Troppawe bekennen und tun kunt offinlich in disem brife
allin den di en sehin ader horen lesin das vor uns komen ist unsir getruwer Machestas unbedwungen
und mit gutem willen und hat di geistlichin bruder di iczunt sein und in kunftigin czeitin werdin des
hawsis czu sant Johannes vor unsir stat Troppawe gelegin des ordins der spiteler sant Johannis von Jheru
salem umb di anspruche des dorfis Witschendorff in unsirm lande Troppawe gelegin als der selbe Machestas
das halbe teyle des selbin dorfis Witschendorff angisprochen hatte vor uns vor unsirn mannen und lantlewten
der egenant Machestas das halbe teyle des selbin dorfis Witschendorff frei queit und ledik gelasin hat aller
ansprache ewiklichin und unhindert und auch ab der selbe Machestas keyne recht hat ader gehabin mochte
an allen den gutern di czu dem selbin hawse vor Troppawe czu sant Johannes gehoren domit her sein erbin
ader sein frunde di bruder des hawsis czu sant Johannes ader ir nochkomligin ader di eynwoner der selbin
guter ader ir anwaldin ansprechen ader hindern mochte sulcher anspruch hat her sich von sein wegin und
seyner erbin und frunde vor uns ewiklich vorczigin gancz und gar also das furbas di selbin bruder und
ir nochkomligin sulcher anspruche eyner ewigin freyheit gebruchen sullen Mit urkunde ditz brifis vorsigilt
mit unsirm anhangindem ingesigil dobei gewest sein unsir getruwen her Niclas von Malenowiz Elblin von
Drabawicz Peter Czechendorf und ander unsir hofgesinde Gegebin off unsirm hawse Grecz am nestin dinstage
vor der offart unsirs herrn Noch Cristis geburt Tawsint dreyhundert Jare in dem andern und achczigistim
Jare