Wir wladislaus von gots genaden zu Hungern Behem Dalmacien Croacien (etc.) Kunig, Marggraue zu Merhern, Herczog zu Lucemburg und in Slesien, Marggraue
zu Lausitz (etc.) Bekennen und thun kunth allermenigclichen, das unns der Ernuest unnser lieber getrewer Babriel Kymmerstorff, als volmechtiger
anwaldt, vorweser und Curator in namen der geystlichen unnser andechtigen lieben getrewen, den gebewdern Creuczherrn mit dem weissen Crewcze
und Schwartzen mantl des ordens des Spitals sannd Johannis von Jherusalem, das man nennet das Spital zu sannd Johanne aber sannt Johannis
des heyligen Tauffers und Ewangelisten in der Stat Troppaw gelegen, ein glawbwirdig vidimus ains briefs, der dem Stifft daselbst etwan
von Niclasen Herczog zu Troppaw umb Raczgiber gegeben, fur und von unns anssammen furgetragen, Bittend underthenigclich, In denselbign
zu Confirmiern und bestetigen, Genedigclichen gewerlichen haben wir angesehen vleissigclich, auch darbey betracht, was von alter gestifft und gegeben
wir das nicht zuminndern gemaint, pesser zumeren, damit der gotsdienst durch unns kainen abganng noch verletzung gewinne, darumben haben
wir Inen solichen brief alles seinen Innhalts, als ob er von wort zu worte hieynnen geschriben und Inbegreffen were, nichts aussgenomen, Confir
miert und bestettigt, Confirmiern und bestetigen den hiemit in krafft dis briefs, aus Behemischer Kunigclicher macht, als Herczog in Slesien
und zu Troppaw, Setzen und wollen, das ytzige und kunfftige gebewder des Spitals und ordens zu Troppaw, wie ob vermeldet, sich desselbigen
briefs laut, mit sein gerechtigkaiten, wie der von weilent Herczog Niclasen dem Stifft zugeet, angenum und gegeben, Auch nhen hernachmals
zu ewigen zeiten, der maynung vor unns, unnsern Erben, nachkomenden kunigen zu Behem, Herczogen in Slesien und zu Troppaw, und sunst vor
yedermenigclichen unuerhindert, halten, nutzen, niessen und gebrauchen sollen und mugen, alles trewlich ungeuerlich, Bebieten darauff allen
unsern underthanen, geystlichen und weltlichen, was standts, wirden oder wesens die sein, Zuuoran unnsern hawbtleuten, ytzigen oder kunfftigen
zu Troppaw, das sy den kunsten gebewder, In dem kainen eintrag noch beschwerung thunt, noch anndern zuthun gestattet, Sonnder sy bey Irer
gerechtigkait, wie In Herczog Niclas den Stifft begabt, der brief weyter aussweist und Innhalt, darbey hanndthabt, schutzet und schirmet, als
lieb einem yeden sey, unnser swere ungnad zuuermeiden, Zu urkundt mit unnserm kunigclichen anhangenden Insigel besigelt, Geben zu Ofen
am tag Simonis und Jude, der heiligen zwelffbotten, Nach Cristi geburt Tausent funffhundert im zwelfften, Unnser Reiche des
Hungerischen im dreyundzwainczigsten, und des Behemischen im zwayundzweinczigsten Jaren.
Ex commissione p(ro)p(ri)a Regie M(aiestatis)