Ich Luppold von Nuchteriticz bekenne offintlich in desim keginwortigin brife allen den dy en sehin adir horin
lesin das ich recht vnd redelich myme libin brudir hern Niklos von Nuchteriticz dem Cruceger des
ordins Sente Joh(ann)is des Spitals von J(e)r(usa)l(e)m habe vorkouft eynen virdung ierlichis zinses of alle mym
gut das ich habe zu Reynuersdorf in vnd of myme gute vm(b) achte schok bemischir grozschin Auch beken
ich das mich der vorgenante myn brudir her Niklos hat gewist myt dem ebenantin virdunge grozschin
an den Com(en)d(u)r vnd an den Conuent der Cruceger des husis zu dem goltberge zu der p(re)czmacz
vnd ich en den vorgenantin virdung gelobe zu gebin alle iar ierlich of den tag Sente app(o)l(o)nie des
heyligin erczengils offintlichin vnd vnvorzogin alles schadins ane alze lange bis das ich den igint
genantin Com(en)d(u)r vnd sinen brudrin do selbist achte schok bemischir grozschin bezale adir en eyne
virdung zinsis andirswo biwise an dem se in lassin genugin Auch besundirn myn brudir her Niklos
der egenante dorch selikeit siner sele vnd siner eldirn sele wille den vor genatin virdung den egesprochin
Com(en)d(u)r vnd brudrin hat gegebin des habin se ym gelobit dy wyle her lebit alle iar an Sente bar
barin tage eyne andachtige messe ir zu lobe zu singin do by ze sollen gemeynlichin sin dy vor der
kirchen erbeit vnd vnmvsse dor zu mogin komin wen abir got obir en my dikke genantin
brudir hern Niklos gebuit so sollen ze ym ymir vnd ewiklichin alle iar ierlichin eyn vigilia myt no(u)in
lexin singin an dem selbin tage sente barbarin der heyligin Jukfrawin zu selikeit vnd zu rue siner
vnd siner eldirn selin das stete vnd gancz czu haldin ane argelist hab ich my ingesigil gezeuchint
myt mynem eip wopin getruwlich an desin brif gehangin Geschen vnd gegebin an Sente Lampretin tage
noch got(is) geborte drigenhundirt iar in dem achte vnd sebmczigistin iare dor by zu geczugnisse vnd gedecht
nisse des sachin sint gewest dy geistlichin vnd irlern brudir des ebenantin ordins her petir vo(n) nowis d(er)
Com(en)d(u)r do selbist her Girke her Joh(ann)es misener her Niklos von lubschicz her Bernher her
heynrich von boyn vnd her petir von der olsen by der geginw(ort) ist gehandilt dese keginwortige
sache