Wir Karl von gotes gnaden Romischer keyser zu allen ziten merer des Riches vnd kunig zu Beheim Bekennen vnd tůn kunt offenlich mit disem brief allen die jn sehen oder horen lesen
das fur vns komen seint die hochgebornen Wenczlaw vnd przymisla herczogen zu Troppaw vnser lieben nefen vnd fursten vnd haben vns furgeleit wie das sie mit dem hochge
bornen hannse dem eltern jrem bruder vnd hannsen sinem sune herczogen zu Troppaw vmb jre zwey teile des landes in Troppaw die sie angehoren geteilet haben vnd vberein ko
men seint in aller der weise als hernach geschriben stet czu dem ersten das anefahen an disem hutigen tag bis vff sand micheltag der schirst kunftig ist vnd von denselben sand
micheltag drey gancze jar nacheinander volgenden derselb herczog hannus ob er lebt vnd ob er nicht were der egnant hannus sin sune der jn erbet alle dieselben zwey teile der
egnanten bruder in dem lande in Troppaw geweldiclichen jnnehaben vnd halden sullen in alle schult der egnant bruder vff sich vnd vff seinen egnanten teile des landes nemen vnd
lassen also das nach den dreyn jaren den egnanten seinen brudern jre vorgenant zwey teile lande vnd guter jn wider vngeantwortet sullen werden an alle jre schulde vngehin
dert an alle widerrede hindernisse vnd arglist vnd sullen ouch alle burggrafen amptlute ritter knechte lehenlute stete vnd burger die in den der vgenanten bruder vnd jn jrem teile gesessen
sein globen mainen truwen das sie nach denselben dreyn jaren sich wider zu den egnanten brudern vnd an jrem teile halden sullen als an jre rechte erbeherren an alle widerrede vnd
argelist sterbe aber herczog hannus der vorgenant jnneynen derselben dreyn jare als got sol er keinen andern an seine stat seczen er habe denne bynne vierczehen tagen dieselben
glubde vernewet als vorngescriben stet ouch sol herczog hannus der egnant alle die egnanten drey jare alle lehenmanne ritter vnd knechte stete burgere vnd lute bey jn allen jren
rechten als sie von alter her gewonlich lassen vnd behalden sunderlichen wenne die egnanten bruder nach den dreyn jaren jre teile wider jnnemen als vorgeschriben stet das sie
denne herczog hannus jn jrem teile ledig vnd frey der gulde die jm herczog niclas seliger jre vatter geben vnd geschaft hat vnd herczog hannus das dritte teile alermesten sullen
also ouch vornemlich das der egnant herczog hannus den vorgenanten seinen brudern alle die obgent zcit drey jare als davor geschriben stet alle jre notdurffte zitlich vnd
erlich geben sulle vnd baten vns des beide herczog hannus vnd ouch die egnanten bruder seine bruder das wir als eyn kunig in Beheim jn sulchen teydungen vnd vberein
komen vns gunst vnd willen machten vnd ouch sie zuliessen vnd confirmiren gnediclichen geruchten des fragten wir vns fursten vnd herren zu Beheim in einem rechten ob sulche
teydunge vnd vbereinkomen vnd ouch das herczog hannus der elter seiner bruder teile vnd schulde also vff sich neme jm mit rechte geseyn mochte vnd die funden vnd sprachen
ouch vns fur recht es mochte wol mit rechte sein zu haben wir durch jre aller fruntschafft vnd bete in allen denselben teydungen vnd vbereinkomen vnser gunst vnd
guten willen geten vnd ouch sie mit volkumenheite mit rechter wissen vnd kuniglicher macht zu Beheim in allen den meynungen vnd stucken als sie vor begriffen seyn
bestetet vnd confirmiret besteten vnd confirmiren sie mit crafft ditz briefs vornemlich also sterbe das der egnant herczog hannus von todis wege abeginge vor dem ausgange
der egnanten dreyr jare das denne der hochgeborn johans sein sune in allen den vorgenanten teydungen bliben vnd der egnanten bruder lande lute vnd teile jnnehaben
vnd halden sol alle die vorgenant zit als davor begriffen ist vornemlich also des ouch sie vns beiderseit gebeten haben were das an jnneynander egnanten teile dieselben
teydungen alliclich oder bey teile bruch wurde das wir denn dem andern teile darczu helffen vnd sturen sullen das jm des jnne vnd geendit werde das davor begriffen ist zu vr
kund ditz briefs versigelt mit vnser kaiserlichen maiestat jnsigel Geben zu prage nach crists geburt dreuczehenhundert jar dornach in funfundsibenczigistem jare an vnser
frowen tag der liechtwey vnser reiche in dem ainsvndzwenczigistem vnd des keisertumbs in dem dreyvndzwenczigistem jare
per cesarem
~D. Jauern~