Wir Růdolf von gotes genaden herczog ze Osterreich ze Steyr vnd ze Kernden Graf ze Tyrol ꝛc Bekennen vnd tůn chunt offenlich mit disem brief als sich vnser lieber getrewer Růdolf
der haslanger zü vns verpunden hat für sich vnd alle sein erbn Bei vns vnd vnsern Brüdern ze beleibn mit der vest vnd geslos Tierberch vnd mit aller irer hab wie die genant
ist vnd vns auch da mit vnd mit zwelf erbern gewappenten ze warten vnd ze dienen wider aller menkhelich nieman ausgenomen von dem nachsten sand michels tag vier ganczer iar
nach ein ander als der brief sagt den si vns dar vber gegeben habent Also habn wir si her wider vmb in vnser schirm vnd genad genomen vnd nemen auch mit disem brief in
solcher weise das wir si die egenanten czeit vnschaden vnd verantwurtten vnd schirmen sullen als ander vnser dien(er) vnd getriw(en) Vnd schaffn in auch bei vnsern genaden das
wir in die vorgenanten vier iar alle iar für irn dienst gebn sullen vnd wellen zwelf hundert guter guldein Vnd habn si der zwelf hundert guldein des ersten iars rechen(d)
Sechs hundert berait bracht vnd gewert Vnd der übrigen Sechs hundert Guldein sullen wir si auf den nachsten sant Jacobs tag richten vnd weren an geuarde Vnd die and(er)n
drew iar sullen wir si alle iar zwelf hundert guldein richten vnd weren zü den vier Quattempern in ainen ieglichen iar zu ieglicher Quattemper drew hundert Guldein an alles
vercziehn als lang vncz das si desselben irs gelts ganczlich(en) richt vnd beczalt werdent in aller mass als vor geschribn stet Wir versprechn auch in mit reht(en) trewen für in schad(en)
den si in vnserm dienst nement Vnd habn in da für ze pürgen gesaczt vnser lieb getrew(en) Chünraden den Chrewczer vnd hansen den loppiczer vnser chamermaister wie der brief sagt
den si in besunderlich(en) dar vber gegebn habent Si sullen vnd mügen auch die egenanten vier iar sicherhait vnd freilaich(en) reiten vnd varen in alle vnserw lande vnd dar in vnd
dar aus wandeln nach allem irem willen on vnser vnd menkhelichs irrung als ander vnser diener vnd getrew(en) Vnd dar vber zu ainem waren vrkunde Gebn wir für vns vnser Brüd(er)
vnd erbn in disen brief besigelt(en) mit vnserm Insigel Der gebn ist auf Tirol an Sontag vor sant michels tag nach Christes gepürt Tausent drew hundert iar dar nach in dem
drew vnd Sechczigistem iar

Ich vlreich von gotes genaden abbt des goczhaws zu Egerhawbten vnd ich pauls hawsner die czeit landrichter in Inntal Bekennen vnd veriehn offenlich pey vnsern trewen das
vns ain solcher pergamenein brief mit ainem anhangendem Insigel fürbracht worden ist den der hochgeborn fürst Růdolf von got(es) genaden herczog ze osterreich ze Steyr vnd kernd(en)
en Graf zu tirol mit seinem aigen anhangenden Insigel besigelt vnd sey gepeten worden das wir des fidimus gebn vnd habn den selben brief an sigel vnd an allen enden ganczen
gerechten vnd vnuermailigten aigenlich gesehn verlesn vnd gehört der von wort ze wort aigenlich(en) vnd lautter Innhalt als da obn geschribn vnd begriffen ist Vnd des zu
vrkund vnd warr geczewknüss habn wir payd vnsre Insigel dar an gehangen doch vns obg(enantem) vlreich abbt vnd vnsern nachkomen vnd paulsen dem hawsner vnd seinen erbn on schade
gebn an sand Lorenczen tag do man zalt von christi vnsers h(er)rn gepürt vierzehn hundert iar Iar nach in dem fünff vnd dreyßigistem Iar