Wir Burgermeyster und Rathmanne der Stat Lewenbergk Bekennen offentlich mit diesem briefe vor allenn und iglichen die yn
sehenn ader horen lesen das wir mit rath, willen und wolgedachtem Rathe aller unser eltisten, scheppen, gesworen, hantwergksmeis=
ter und ganzen gemeyne und besserung willen gemeynes nutze, und domit wir uns von andern beschwerlichern czynsen gefrey=
et und gelost, recht und redelich Im namen eynes widerkauffs uffgeschlossen vorreyht und verkaufft haben funffczehen margk
grosshen Jerlicher czynse und eyn malder haber czu eynem seleyerethe eyner ewigen messe, wilche etwan der gestrenge Herr Cun=
rad nymbtzsch Ritter ir seliger uff der heyligen czwelffboten sant Jeroffe altare In unser pfarrkirchen gestifft hat dem acht=
baren wirdigen Herrn Wolffgango sumer Commendatori czu Lewenbergk und den Creutzherrn doselbst In und uff alle unsre
Statrenthe, czynse, hinfelle, gesthosser und andere eynkomen ader genissen, es sey In ader vor der Stat uff dorffern, forwergenn
walden, wysen, teichen, molen und andern nutzbarkeyten benandt ader unbenant gar nichts außgenomen czugeben und czubeza=
len dieselben czynse alle Jor Jerlich achtehalbe margk grosshen uff Walpurgis nehstkunfftig antzugeben und achtehalbe
margk grosshen uff egedigdis dornochfolgende, den grosshen ye czu siben pfenningen gerechent, Und das malder haber ader
eyne halbe margk geldes dorfur sall alle Jor Jerlich gefallen uff sant Martini tag nu uff den nehstkomenden antzugeben
und also furbasmeher alle Jor Jerlich uff benante tage czugeben und unvorczuglich czubezalen. Von solchem czynsen
sall haben der Herr Commendator czwehen margk, die Creutzherrn funff margk und eynen firdung und der glockener ey=
nen firdung. Und ap wir In bezalung angeberegter czynse, do got vor sey, seumig wurden, so sollen und mogen der ge=
nante Herr Commendator und die Creutzherrn die itzunt seyn ader noch yn komen werden umb ire vorbessene czynse pfen=
den mit hulffe des Erbrichters In und uff allen unsern und gemeyner Stat guttern, es sey an czynsen, Renthen In pfennin=
ges ader getreydes weyse als oben geschriben stehet nichts außgenomen als offte und dicke yn das not wirt sein, mit
denselbigen pfanden sie auch thun mogen als alle recht domit begangen weren. Doch mit diesem furbehalde wenn wir
und unsere nochkomende Ratmanne den bemelten czynse wider abekouffen und losen wollen, das sollen und mogenn
wir thun ye eyne margk geldes mit funffczehen margk grosshen prager muntze polnisscher czal und das malder ha=
ber mit achtehalben margk grosshen der genanten muntze und czal wenn wir wollen ungehyndert. Und wenn solchs
czynse von uns wider abegelost wurden, denn sall der Herr Comendator und die Creutzherrn die itzunt seyn ader In
kunfftigen czeyten seyn werden dasselbie gelt bey uns dem Rathe uff das Rathaus eynlegen und denne noch unser
beyder rathe willen und wissen andere czynse umb dasselbie abegeloste gelt gekoufft werden, Also das das seleyerethe
ewiglich vor sich gehe und gehaldenn werde. Des czu sicherheyt und vhester haldung haben wir unser grosser
Statsecrett an diesen brieff hengen lassen der gegeben ist freytags noch purificacionis Marie Nach Christi unsers
liebenn herrun geburth funffczehenhundert unnd Im virundczwentzigistenn Jare