In gotis namen Amen Wir nachgeschreben h(er) Boroth von stacho Amptm(an) h(er) Jacob pfarner vnd d(er) gancz co(n)
vent czuw Cyncz thun kunt vn(d) czu wissen allin kegenwortigin vn(d) czu kunftigen lewtin daz vor vns ist kome(n)
vnsir getruwer vnd(er)ses Hannos popilwicz Schultis czuw Cyncz vn(d) katherina seyn elich weyp mit wolbe=
dachtim mute mit gutir vornuft vn(d) mit gesu(n)dim leybe vn(d) got bekant vnbetwungen vn(d) an arg wy dy
pyetancze czuw Cyncze hab gekawft recht vnd reddlich vor em vn(d) auch bey em yn vn(d) vf daz gerichte czu
Cyncze vn(d) vf alle czu gehorung funf marg Jerliches czynses pregissher grossin polnissher czal vn(d)
funfczig marg der egenantm grossin vn(d) gab d(a)z got sich d(er) oftegenante Hannos vn(d) katherina seyn
elich weyp vorlobt vn(d) vorwillekorth dy selby funf marg cynse Jerlich czu geben vnd czu geldin
vnvorczoglich vf cwey tage drithalb marg vf synt mertins tag der nu czukunftig ist vn(d) drithalb
vf synt walp(ur)gen tag dor noch ey dem selbyn Jar Also lange bys der egenate Hannos ad(ir) seyn elich
weyb adir seyn eliche noch kumling ys vormogen ap czu kawffin ey marg vn(d) ab eyn marg so dy
marg vn(d) czey marg vf dy vorbenaten tage alz dy cynse benu(m)t synt vn(d) ab d(er) egenante Hannos ad(ir)
sey noch kumling dy selby funf marg vor den vorgenatin tagin woldin ab kawffin zo sullen zy dy
vorfassin cynse geben noch der wochin czal Auch ab der egenate Hans ad(ir) katherina sey elich weyp
ad(ir) seyn elichin geerbin ad(ir) wer daz gerichte besiczt dy vorgenatin cynse nicht geben vf dy ofgenatin
tage zo sal eyn pyetanczmeyst(er) der an den selbyn geczytin ist ad(ir) noch in czukunftigen czyten komen
mocht vf dem vorgenatin gericht czu cyncz vn(d) vf allir czu gehorung ys sey an erbe ad(ir) an cynse
pfendin recht ap hers mit dem rechtin dirvordirt hett vn(d) mit den pfenden thun alz daz gewonlich
ist nymande wed(er)sprechin(de) noch bekentnis des vorgenanten Hans popilwicz vn(d) durch gebetis wil=
lin des pyetanczmeyst(er)s So hab ich vorgenat(er) h(er) Boroth Amptm(an) czu cyncz mey(n) yngesegil an
desen briff gehengit Gegeben noch gotis geburth dryczen hundirt Jar dor noch yn dem newn vn(d)
newnczigistm jar an synt Egidius tag do bey synt gewest dy erbrin vn(d) fromen czerteyn krez=
mer pet(er) blosey Hanush Babnyk vn(d) anthel lant vn(d) and(er) irbr lewt vil dy dor czu wordin geruft
vn(d) geladin