Ich Boresch von Stachalu Bruder des ordins sinte Johanns von Jherusalem Compeor czum grossin
tyncze Bekenne vffentlich in dezim brife allin dy en seen adir horin lesin das vor miner
geginwortikeit gescheen ist das d(er) vrome knecht pet(er) kinczin recht vn(d) redlich vorkowft
hat eyne halbe marg gut behemischer grosschin polmisch(er) czal ierlichs czins vff petraschin
janusch wawrzkin brud(er) in vn(d) vf alle syme gute is sy beweglich ad(ir) vnbeweglich
der pyetanczin czum Jssin czu tyncz vm(b) fumf marg gut grosschin dy en den vorgenantin
pet(er) kincziner dy pyetanczie gancz vnde gar mit enander beczalit in eyme hawffin. Do
Reysete petir kinczin den obegenantin petraschin an dy pyetanc(zie) mit der halbin marg
czins. Vn(d) der selbe petrasch globte d(er) pyetanczin dy halbe marg czins ierlich czu gebin
vff sinte mertins tag. Ap das nicht geschege das d(er) czins vff dy benumete czit gancz
vn(d) gar nicht gebist zo sal an(d) mag eyn pyetanczier meyst(er) d(er) vrow(e) is adir her awch
komen muste mochte vf den vorgenantin petraschin vn(d) vff alle syme gute das h(er) nu
vn(d) hat pfendin vnde mit den pfandin tuen alzo alle recht do mete begangin werin
Ouch ist der kowff gescheen mit vnderscheyt. wen is der egenante petrasch adir
ymat der sine vormag vn(d) wil dy halbe marg czins wedir abekowffin vn(d) losin. das sal
eme dy pyetanczie gerne an(d) wol gunnen vnschedelich vorczisin czinsin. zo sal der ege=
nante petrasch d(er) pyetanczin wedir beczalin vnde gebin fumf marg gut grosschin
mit enander eyn eyme hawffin. vn(d) sal von der pyetanczin vorbas ledig sin vnde sin
genant. des czu orkunde habe ich Boresch von Stachalu min Jngesegil lan hengin an
desin keginwortigin brif der gegebin ist noch gotis gebort tawsent viar hundirt
1404 in demnoch in dem firdin iare. am nestin donrstage noch Epyphanie domini :~