Wir Karl von got(es) gnaden Romischer keyser zu alln zeiten mer(er) des Reichs und kunig zu Behem Bekennen und tunkunt
offenlich mit disem briefe allen den die in sehen odir horent lezen das fur uns komen ist der Hochgeborn Bolke Herczog
zu Munsterberg unser lieber Swager und furste und bate uns mit vleisse wani er der Hochgeborn Eusenna seiner elichn
wirtinne zu rechtem furstlichen leibgedinge gemacht und geben hette die Stat Munsterberg mit irem weychbilde mit
aller herschaffte rechten nuczen und tzugehorungen und mit namen hundert und fumfzehen marke geldes uf den dorffn
Warvenow Briese und Hermansdorff als er die hat und besiczet die von uns als eynem kunig zu Behem zu lehne ruren
das wir zu sulchem leibgedinge als eyn kunig zu Behem desselben furstentumes und herschaffte oberster und naturlicher
lehenherre unser gunst und guten willen zugeben und dieselb Stat mit irem weichbilde herschaffte nuczen und zugehor(n)
mitsampt hundert und fumfzehen marken geldes uf den egen(anten) dorffern die gelegen sein in Grotkaur weychbilde als vor
geschribn stet der egen(anten) seiner wirtinne zu rechtem furstlichen leibgedinge gnediglich zu vorleihen geruchen des habn
wir durch sundirliche gunst und liebe die wir zu dem egen(anten) unsirm Swager habn seine redliche bete gnediglich erhort
und haben mit wolbedachtem mute mit rate unsir fursten Edln und getruwen zu demselbn leibgedinge unsire gunst
und willn gebn und der vorgenant(en) Eusenna seiner wirtinne dieselb Stat Munsterberg mit irem weichbilde her
schaffte nuczen rechten und zugehorung(en) mitsampt den egen(anten) hundert und fumfzehen markn geld(es) als vorgeschri
ben stet zu rechtem furstlichen leibgedinge vorlihen und gereycht leihen und reychen ir die mit crafft ditz briefs mit
rechter wissen und kuniglicher macht zu Behem von uns und der Crone zu Behem zuhabn und als furstliches leibge
dinges recht ist alle ire lebtag zu besiczen dorubir ouch sie mit unsire gunst und guten willn zu vormunden und vor
wesern gekorn hat die Hochgebornen Ohnucz zu der Ossen und Heinr(ich) zu dem Briegg Herczog unse liebn Sweger ir dasselb
leibgedinge wiczuhalden und sie dorinne getruwlich zu vorwesn tzu urkund ditz briefs vorsigelt mit unsir keyserlichen
maiestat Ingesigle Geben zu Prage noch crists geburde dreyczehnhundert Jar dornach in dem dreyundsybenczigistem Jare
an sand Michels tag unsir Reiche in dem Achtundzwenczigistem und des keistums in dem Newngenden Jare