Wir Johannes von gotes gnaden Bisthoff zu Breslaw (et)c(etera) Bekenn vor ydermeniglich mit desem unserm brieffe Nachdem wir und unser vorfarn Bisthoffe
von anstaltunge unser kirchen und renten zu unserm Bischofflichm Tiffte gehorende dy feltzehenden yn und von den dorffern und Guttern Bank, Czindel, Bertils-
dorff, Clesdorff, Jaur, Gundersdorff, Ozergenaw, Polnischbreil, frawenham, Neman, Galn, Woeze und CleynJankowitz zu dem hawse Crewtzigerorden zur Cley-
nenelssn gehorende gehabt und haben sullen dy denn durch unsere vorfarn Bisthoffe zeliger gedechtniss etwann Pratzlaum und auch Petrum zu etlicher suma
geldes nemlich funffundczwentzig Mark Behemischer grosschn zu cziytn auch vor Junge gewachsene ros bawholz auch zu kost czerunge und offnemuge der bisth-
offe zu cziytn mit yrem gesynde und rossen nachgelossen seyn nach gelegenheyt der cziyt Seyn Wir durch sunderliche ermanuge unsers nehstn vorfarn zeligen
Bisthoffs Rudolphi durch seyne eygene hantschrifft hinder em gelossen auch awss unser verpflicht dy wir unserm stifft schuldig seyn beweget worden sulche
unsere gerehtikeyt zefordern und haben darumb den Wirdigen Namhafftign herrn Jorgn Bawsk Compter des gemeltn hawses zur Cleynelssn mit geist-
lichem rechte furgenomen Also seyn der Wolgeborne Erwirdige Wirdige und Ersamen Namhafftige herr Johann Labut von Swamberg zu Strakonitz Meyster
des ordens sanct Johannis Jerosolimitan in Behemen Slezien und Polen herr Sigmundus Hertil seyn Stathelder und Compter des hawses zum heiligen leich-
nam zu Breslaw der gnant her Jorg Bawsky zur Cleynelssn Hannss hund zum Brige und ettliche andere Comptere yn zune weyze an uns komen den
haben wir uff yre bethe auch angesehen das dasselbe hawss fast besweret ist Zugesagt ganczer zehen Jor von dato diss brieffs czerechen von allen obgenanten dorf-
fern und Guttern so weyt sy das gemelte hawss und Orden zur Cleynelssn an gehorn yzlichs Jar an funffzehn marken ganghafftiger munge gnugig zeseyn
dy der genant herr Jorg Bawsk Compter seyne nachkomen Comptere und Conuent zur olssn obgenant alle Jor uff sant Martini tag Unserm hoferichter ken
Grotkaw der do ist oder seyn wirt sendn und beczallen sulln denn bann und geistlicher acht Wir haben en auch awss sunderlicher gonst und gnaden nachge-
lossn alle vorfessene czehenden ader gelt das sy do vor hettn sullen geben von den iczt vorgangn Jorn durch uns und unsern nochkom Bisthoffn und kirchn yn zu-
kunfftign Joren an unserr herschafft und gerechtigkeyt allenthalben unschedlich Geschen und geben zu Breslaw am Montage nach der heylign dreyko-
nige tage Nach Cristigeburt Tausentvierhundert und ym funffundachtzigsten Joren Dobey seyn gewest dy gnantn heren Meyster und Comenda-
tores alze furbitwaldn und dy wirdign und Erbar hochweysen herrn Johannes Snedur Meyster yn freyen kunstn Probest Johannes Guden Johannes heilf-
berg Licenciatn Nicolaus Awerberth Nicolaus Tanchn Doctores yn geystlichm rechtn Thumherrn unser kirchn Lucas kyssenerich Hawptman der
Stat Breslaw und Martinus lelner probst zur Neiss unser schreiber In got liebn bruder und getrawn hebn