In nomine domini amen. Cum appellacionis remedium non sit iniquitatis vinculum sed oppressorum subleuamen. Ego frater Marsilius canonicus ecclesie Syloensis plebanus Iglauiensis
Olomucensis diocesis senciens me a Reuerendo domino episcopo Pragensi indebite et contra formam iuris aggrauari, ex eo quod primo in die sancte trinitatis venerunt scilicet plebanus
de Brtowe et alius plebanus de sancto nicolao nomine ipsius domini Pragensis episcopi et clericum nomine Ruzkinum violenter induxerunt in capellam sancti Iohannis baptiste in antiqua Iglauia que
ad meam parochiam spectat immediate, In cuius possessione pacifica vel quasi ego et antecessores mei tanto tempore fuimus quod dinoscitur legittime prescripsisse, Insuper
manifestas violencias intulerunt videlicet seram dicte capelle frangendo et aliam apponendo cum secularibus scilicet Pilgrmo ciui de Gumpolz cum suis complicibus qui eciam
timore dei postposito manus violentas in confratres meos sacerdotes coram pluribus iniecerunt, Ex hiis grauaminibus et vlterius contra me factis dominus episcopus vel
michi adherentes qualicumque occasione predicta, In hiis scriptis ad Reuerendum dominum archiepiscopum maguntinum appello et aplos cum instancia instanti et instantissime
michi dari peto, supponens me et michi adherentes sub protectione eiusdem Reuerendi domini archiepiscopi maguntini prestans vt eadem appellacione pendente contra me et mi
chi adherentes nulla nouitas attemptetur, non astringens me ad probandum de predictis nisi ea sola que de iure tenentur et sufficiant ad victoriam dicte cause, protestans eciam quod tum
propter pericula viarum tum eciam propter timorem que ex certis coniecturis ad predictum dominum episcopum Pragensem habeo coram ipso in presenti appellare non presumo nichilominus quocienscumque potero
per me vel per procuratorem sufficientem ipsam appellacionem coram ipso innouabo. Facta est autem hec appellacio anno domini M. CCC. VII. VIII. Kalendas Iunii. In die sancti
Urbani pape et martiris, In ecclesia fratrum minorum coram domino Antonio gardiano et fratre martino et aliis fratribus dicte ecclesie et coram fratribus ordinis predicatorum scilicet ottone
suppriore et Boryzlao lectore et aliis fratribus ecclesie sancte crucis in Iglauia et coram Zibotone Iudice et iuratis scilicet henrico et chunrado gundolfo et aliis quam pluribus
eiusdem ciuitatis, In cuius rei testimonio sigilla mea duximus aponenda.