Wir Ferdinand der Dritte von Gottes gnaden Erwelter Römischer Kaiſer,
zu allen zeitten Mehrer deß Reichs, in Germanien, zu Hungarn, Böhaimb, Dalmatien, Croatien, vnd Sclauonien (et)c(etera) König, Ertzhertzog zu Oſterreich, Marggraff zu Mähren, Hertzog
zu Lützenburg vnnd in Schleſien, (et)c(etera) Marggraff zu Laußnitz (et)c(etera) Bekhennen hiemit offentlich vor Jedermenniglich, demnach Vnß N: N: Prior, vnnd gantzer Conuent deß Würdigen Stiffts vnd Gottshaußes auff
dem Strahoff zu Prag, in Vnterthänigem gehorſamb zuuernemmen geben, wie daß Sie nach Tödtlichem Hintrutt Weiland Caspari à Questemberg, geweſten Abbtens alda, durch aine ordentliche Wahl, nach Jnhalt Chriſtlichen
Rechtens, vnd gewonheit, auch nach außweiß vnnd Jnhalt des Ordens Statuten, vnnd krafft deren von Weiland Vnſern gnedigiſten Herrn Vorfahrn Chriſtildiſter gedechtnuß, Wohlgegebnen Privilegien, den Wür
digen vnd Andächtigen Vnſern lieben getreuen Crispinum Fuck von Rhedig, Abbtens zu Mülhauſen, zum Abbt vnnd Vorſteher bemeltes Stiffts ernennet, erwehlet, vnd angeſetzet hetten, mit angeheffter gehorſambſter demüettigiſter
bitte, Wir geruheten Vnß ſolche Wahl gnedigiſt gefallen zulaßen, dieſelbe auch zu confirmiren, vnnd zubeſtetigen. Alß haben Wir in Kaiſer: vnnd Königlichen gnaden angeſehen, ſolche deß beſagten Prioris vnnd Conuents, zimb
liche bitte, wie auch mehrberührts neuerwehlten Abbtens Vnſerm Hauße Öſterreichiſche Erben, treuete, vnd ſonderbahre guete bekhandte qualiteten, vnd demnach ſolche Election gnedigiſt ratificirt, vnd beſtetiget. Thuen ſolches
auch hiemit wiſſentlich, alß Regierender König zu Böhaimb, in Krafft diß Brieffs, Mainen, ſetzen, vnnd wollen, daß beſagter Crispinus Fuck angeregtes Stifft vnd Cloſter zu dem Strahoff, nach außweiß Jhrer Geiſtlichen Rechten, vnd Statuten,
gantz nicht allein in spiritualibus, zu Lob, Ehr, vnnd Ehr deß Allmechtigen, vnd fortpflantzung der heiligen Allainſeligmachenden Catholiſchen Religion, ſondern auch in temporalibus, alle deſſelben Vnterthanen vnd Zugehörige zu des
Stiffts Nutz vnnd auffnehmen ſeinem beſten Verſtandt vnd Vermögen nach regiren, die Ordens Disciplin fleiſſig in acht nehmen, vnd in summa alles das ienige was ainem getreuen Abbt, vnd Vorſteher, laut ſeiner gethanen Pflicht zuſtehet
vnd gebühret, auch zuerhaltung des Stiffts wohlerlangten Priuilegien, Recht vnd Gerechtigkeiten, nutzlich vnd Vonnöthen ſein wirdt, ihme treulich anbehohlen ſein laßen, in acht nehmen, vnd auffs beſte befördern. Gebieten hierauff
allen vnnd Jeden Vnſern Vnterthanen, was Würden, Standts, Ambts, oder Weſens die ſein, hiemit gnedigiſt vnd Vrnſtiglich, daß Sie mehrermelten Crispinum Fuck, Vor ainen ordentlichen erwehlten vnd von Vnß Confirmirten Abbt vnnd Vor
ſteher mehrgedachtes Stiffts vnd Cloſters zum Strahoff, erkennen vnnd Ehren, Inſonderhait aber Vnſern ietzig: vnd künfftigen Stadthaltern Vnſers ErbKönigreichs Böhaimb, daß Sie Jhn in ſeiner Iurisdiction, Administration, vnd ſonſt
im geringſten nicht beirren, noch dieſes andern zuthuen Verſtatten, ſondern Jhn vielmehr in allen billichen ſachen, die Hülffliche handt bietten, vnd gebührenden Schutz halten, denen Ordens Brüdern aber, vnd zum Stifft gehörigen Vnterthanen einhal
ten, daß ſie Jhme alß Jhrem Vorgeſetztem Haubt allen ſchuldigen respect, Ehrerbiettung vnd gehorſamb leiſten, außander nicht thuen ſollen, bey Vermeidung Vnſerer ſchweren Straff vnd Vngnade. Zu Vrkundt diß Brieffs, bekräfftiget mit
Vnſerm Kaiſer: vnd Königlichen anhangenden Secret Inſigel. der Geben iſt in Vnſerer vnd deß Heiligen Römiſchen Reichs Stadt Regenspurg, den zwaintzigiſten Monatstag Augusti, im Sechtzehenhundert vnd Viertzigiſten, Vnſerer Reiche deß Rö
Ad mandatum Sac(rae) Cæs(areae)
Maiestatis proprium.