Ich Johann Christoff Chuchelsky von Nestagow Bekenne
hiemit für mich vnd meine Erben mit dieser meiner Cession Vbergab vnnd gueten Willen Vor Jedermanniglich sonderlich da sichs gebü
ret, Demnach mir J(h)r(e) Kay(serliche) May(estät) Löblichen Königlichen Böheimbschen HoffCanzley, Vorandern Zeit auff Vorhergangene Vmbstendige scharffe Vnnd genaue liquidation, eine gewisse Summa gelts
bey der AltTzitzischen Verlassenschafft Zuerkent, Vnnd darauß VierTausendt gulden Rh(einisch) Capital alß eine real Hypotec, auff die geweste AltTzitzische, Vnnd hernach dem Herrn Obristen De Broux,
cum onere der darauff Verwißenen Schulden, eingeraumbten Gütter Dobrowitow, Chlumb Vnnd Krchleby, krafft deß a(nn)o (et)c dato deß EinVndZwanzigsten January Anno SechzehenHundertZwey
VnndViertzig ertheilten Kayserlichen Decrets, Zubezahlen angewiesen; Diese meine Post der VierTausendt gulden Rhein(isch), auch allso in die General lysta der AltTzitzischen Creditorn, angesetzt, Vnd der
Königlichen Böheimbschen Landtaffel ordentlicher weiße einVerleibt worden; Vnd ich nun solche meine auff ermelten Güttern hafftende Schuld, Vnnd real Hypotec, der VierTausendt gulden Rheinisch
Capital sambt den daron Verfloßenen Vnnd noch darauff gehenden Interesse, Vnnd also solch mein ganzes Völliges Jus Crediti sambt obigem mir ertheilten anweißungs Decreto, cediret Vnd Vbergeben habe;
Thue solches auch, cedire Vnnd Vbergebe dasselbe hiemit Vnnd in krafft deßen, wißentlich Vnnd Wohlbedächtig, dem Edlen Vnnd Gestrengen Herrn Adamo Peclio Von Adlershaimb, Röm(ischer) Kay(serlicher) May(estät) Rat(h)
auch in der Böheimbschen Hoff Secretarij, Alß Vnnd dergestalt, daß nunmehr Er Herr Peclius, seine Erben, Vnnd ein ieder Innhaber dieses, mit dieser ihme cedirten Schuld der VierTausendt gulden,
sambt denen daron Verfloßenen Interesse, seinem freyen belieben nach, ohne mein Vnd sonsten Jedermänniglichs hinderung Vnd eintrag, alß mit seinem Aigenthumb Zuthuen Vnd Zulassen, Zu schalten
Vnnd walten Vollkombliches Recht, Macht Vnnd gewalt hat, Wir meinen Erben, oder einigem andern Menschen, einiges Recht, forderung oder Zuspruch, an solcher Schuld der VierTausendt gulden
Capital, sambt den daron Verfloßenen Vnnd noch lauffenden Interesse, nit Vorbehaltendt; Es solle auch obbemelter Herr Peclius seine Erben Vnnd ein ieder ordentlicher Cessionarius Vnd gewiser
Brieffs Innhaber, dieser meiner Cession, Macht haben, selbe Zu Ihrer mehrer Versicherung, in die Königliche Böheimbsche Landtaffel, der Vernewerten LandtOrdnung gemäs, einVerleiben Zulassen,
alles getreulich Vnnd ohngefehrde. Zu Vrkundt hatt: Vnnd Vesterhaltung deßen, Habe ich diese meine Cession, Vbergab Vnnd guetten willen, nicht allein mit meiner aige
nen Handt Vnderschrifft Vnnd auffgedrucktem Adelichen Pitschafft, bestettigt, Sondern auch Zu mehren gezeugnuß deßen, gebetten, die WohlEdle Gestrengen Herrn Beneßden Lukawsky Von Lukawetz,
Vnnd Herrn Ernst Von Schützen Vnnd Pürckhaimb, daß Sie ihre Pitschafften ingleichen Zu dieser meiner Cession Vnnd Vbergab, anhangen laßen, Vnd sich in derselben (: Jedoch alles Ihrer Vnd
Ihrer Erben ohne Schaden :) aigenhändig Vnderschrieben, Geben Zu Wien, den fünffZehnenden tag deß Monats Junij, im SechzehenHundertVierVndViertzigsten Jahr.
Johann Christoff Chuchelsky
von Nestagow
Beneß lukawski
von lukawitz
Ernst von Schütz
(mppria)