Wir Andres plumel Richter Jacob vom Rosental Nicoman fleyscher Gesepfenmeyst(er) in der czeit Niclas silber hannan alder
wenczlab kauffman hannos siczlas ditreich goltsmid Niclas kionel hensel diwmel Bernhart goblouicz Johannes vo(n) pelgem
petir vom pyesk hanns ryse vnd dy and(er)n Gesepfen gemeinlich des perges czu chuty Bekennen vnd tun kunt alln den dy
nu sein ader hernach kunftig werden das fur vns komen sein in eime vollen Rat do alle dink crafft vnd macht nemen vnd behal=
den dy erbern wenczlab roil vnser liber mitpurg(er) vnd wenczlab von kosiczan eliche furmunden ettwen des czanken von hondal kint
vnd irer guter vnd haben bekant mit wolbedachtem mute williclich vn(d) betwung(e)n wy das si recht vnd redlich vorkaufft vnd aufgeben
haben vorkauffen vnd aufgeben in krafft dicz priefs auff den hofe vnd Erbe gelegn czim hondel in colner kreyß der ettwen des czanke
ist gewesen mit auf altn vnd nuczlichn seinen inczen vnd czugehorungn mit welichem name dy genant mugen w(er)den funff schok
guter groß jerlichs vnd ewiges czinses doch von derselbn des czanken kinder wegen den erbern wenczlab junczen auch vnsern liben
mitpurg(er) Annan seiner elichn hausfrawen vnd wem si des gunnen vmb funffczig schok gut(er) groß dy derselbe wenczlab juncz den egen(anten)
furmunden mit bereytem gelt gericht hat vnd beczalt vnd diselben furmunden haben furpaz mit demselbn gelt dy ersame frawen
genant kunczsehe ettwen des czanken hausfrawen von ir morgengab wegn gancz vnd gar abgericht vnd beczalt czugeben vnd
czuczinsen ein halftail desselbn czins das sint dritthalb schok guter groß prag(er) muncz auf sant Galli tag vnd das ander halftail
das sint auch dritthalb schok der egen(anten) grossen auf sant Jurg(e)n tag der darnach am nehesten volget vnuerzogentlich vnd also czu
tun vnd czuczinsen auf diselbn czinsige jartag vnd entricht alle czins nachein(an)d(er) in czukunftigen czeit wer den sach ab di besiczer
des obgenan(ten) hofs vnd Erbes czim hondel dy nu sein ader in czeitn sein w(er)den an beczalung des egenan(ten) czins seumig wurden czu
welichem czinstag das geschee do got fur sy so sol ein hant auf ein iczlich schok groß des vorseßen czins alle wochen dy weil d(er) czins
vnuergolten ist siben gros czu wucher gewissn geen vnd wachsen koon den dy obgenan(ten) wenczlab juncz Anna sein hausfraw ader der
disen prieff haben wirt des vorseßen czins mit sampt den pussen dy darauff gangen vnd gewachsen weren nicht lenger peyten noch erpern
wolden do mugen si mit eygner krafft mit hulff des Richters vnd der Gesepfen des perges czu chuty dy in czeit sein wurden ader
mit macht aller vnd iczlicher der si darczu czihen mugen den oftgenan(ten) hofe vnd Erbe czim hondel vnd alle seine nucznd vnd vnnucznd habe
pfenden daselben pfant treyben tragen furen einseczen czuuerkauffen getailt ader vnteilnand(er) vnder cristen ader juden an ansp(ra)ch
eins iczlichen gerichtes mit vollem rechten vnd das so ofte getun als oft der czins mit seine pussen czu sein gewonlichn czinstagn
von den besiczern desselbn hoffs vnd Erbes czim hondel phle vnuergolden Auch sunderlich czugelegt wen di besiczer des vilgenan(ten)
hofs vnd Erbes czim hondel dy nu sein ader in czeitn sein w(er)den ader dy obgenan(ten) furmunden eine and(er)n ewigen czins funff schok
groß auf eime and(er)n Erbe das do in eimer meil vmb den perg ist gelegn kauffen vnd gewisen daran sich dy egen(anten) wenczlab juncz
vnd Anna sein hausfraw lassen genugen so sol der oftgen(ante) hoff vnd Erbe czim hondel furbaz des obgenan(ten) czins frey sein vnd
ledig Auch also bescheydenlich weliches vnder den egenan(ten) wenczlab juncz vnd Annan ee abging vnd sturbe so sol der vilgenan(te)
czins ffunff schok groß an das das do lebendig pleybet an alles vndersprechn lediclich geuallen Vnd wir den kieg(er)n voren(ten)
prieff hat dem gepiten alle vorgeschribn recht diser sach czu einer steten vnd ewign sicherhait haben wir obgenan(ten) Richter vnd
Gesepfen des obgenan(ten) perges czu chuty vnser gemein jngsigel das grossere czu geczewknuß an disen prieff gehanget der
do gescriben ist nach cristi gepurt virczehen hundert jar vnd darnach in dem vierden jar des nehesten Sunntages
nach sant Jurg(e)n tag des heylign marterers