Wir Waczlaw Vorsucher Richter Hana von Kaudem Bernhard Lilgenstam Schepfenmeister in den czeiten Cristoff Vorsucher Hannan Alder Huncz Oderm Bernhard
Koblowicz Hannus Spiczlas Jodusch Cemsweck Peter Schuttenhoff Hanus Kauffman Wenczlaw Thobie Nicolaus Thawbner Nicolaus Leuchtendorff Hannuscho Vom
Preß vnd ander Schepfen gemenlich des Berges czun Chutten bekennen vnd kunt allen dy nu sein ader hernach kumpftig werden das fur vns kumen ist in einen vollen
Rate do alle dink crafft vnd macht nemen vnd behalden der Erber Wenczlaw von Trubomicz vnser liber mitpurger vnd hatt bekant mit wolbedachtem mute vnbetwungen
von seinen vnd aller seiner erben vnd nachkumlingen wegen Wie das er recht vnd redlich vorkauft vnd aufgeben hab vorkauft vnd aufgibt in crafft dicz brieffes vff
seinen hoff vnd erb genant Trubomicz vnd vff alle seine nucz vnd czugehorunge gelegen in Czaslawer kreyß Sechs schok groff jerlichs vnd ewiges czinses dem bescheiden
Ambrosio etwen des henrichs Naczen guter gedechtnisse sun seinen erben vnd nachkumlingen vmb Sechzik schok guter groff prager muncz die der egnan(te) Wenczlaw
gancz vnd gar eingenomen hat vnd empfangen geben vnd czuczinsen halftenteil desselben czins als drey schok guter groff vff sant Gallen tag der do nu nest kumpf
tig wiert vnd das ander halftenteil das sein aber drey schok der egnan(ten) groff vff sant Juergen tag der darnach am nesten volget als czinses recht ist vff dy egnan(ten)
czinsteg ewiklich in czukumpftigen czeiten Wer aber sach ab der egnan(te) Wenczlaw sein erben ader nachkumlingen ader besiczer des egnan(ten) gutes an der beczalung
des obgenan(ten) czinses sewmig werden auff welchen czinstag das geschee So sol czuhant noch einem iglichen czinstag vff ein iglich schok des vorfessen
czinses alle wochen vier groff dy weil der czins vnvorgolden ist czu rechter czinspus gen vnd wachsen vnd wenn den der egnan(te) Ambrosius sein erben ader
nachkumlingen des vorfessen czinses mitsampt der spucz di dorauff gangen vnd gewachsen wer nicht lenger beyten noch empern wolt(en) so mugen si mit
eigner crafft ader mit hulff des Richters vnd der Schepfen des Berges czun Kuttn dy in czeiten sein werden ader mit hulff aller der der si genisen mugen
das vorgenan(te) Erb vnd gut Trubomicz vnd alle seine varende ader vnvarende hab wo di sein ader wonan di findet pfenden diselben pfant trugen treiben
furen czuvorkauffen ader czuvorsetzen geteilt ader miteinader vnder den Cristen ader Juden mit vollen rechten an auffgebot eines iglichen gerichtes
vnd das als offt czutun als offt der czins zu seinen gewonlichen czinstegen blib vnvorgolden Auch also bescheidenlich wenn der egnan(te) Wenczlaw sein erben
ader nachkumlingen Sechs schok czinses auff einem andern gut kauffen daran In der oftgenan(te) Ambrosius seine erben ader nachkumligen genugen
lassen so sol den das egnan(te) gut Trubomicz vnd alle seine czugehorungen des egnan(ten) czinses frey sein vnd ledig Auch sunderlich czugelegt das der offt
egnan(te) Wenczlaw sein erben ader nachkumlingen den egnan(ten) czins nicht vorkauffen noch einem andern vorreichen sollen es wer denne das si den
hat dem gepurn alle obgeschribene recht als Im selber Vnd des czugedeknisse vnd bess sicherheit haben wir obgenan(ten) Richt(er) vnd Schepfen vnsr
Gemein Ingesigel das groser gehenget an disen brieff der do Geschriben ist noch Cristi geburt Vierzczenhundert Jar vnd darnach in dem sibenden
Jar des Sontags noch vnser Frawen tag Natiuitat