Clemens decretorum doctor Scolasticus ecclesie Olomucen(sis) domini pape capellanus et ipsius sacri palacij apostolici causarum auditor ac iudex a sanctissimo in Christo patre et domino nostro domino Johanne diuina prouidencia papa xxiij ad infrascripta specialiter deputatus Vniuersis et singulis dominis Abbatibus prioribus prepositis decanis Archidiaconis Scolasticis Cantoribus Thesaurarijs Custodibus Sacristis et Canonicis tam Cathedralium quam Collegiatarum et parrochialium ecclesiarum Rectoribus seu locatenentibus eorundem plebanis viceplebanis vicarijs perpetuis ceterisque presbiteris clericis et notarijs publicis tabellionibus per ciuitatem et diocesim pragen(sem) constitutis et eorum cuilibet in solidum ad quos presentes nostre littere peruenerint et presertim vobis venerabili et religioso viro domino .. Abbati monasterij beate marie virginis in Sazaw(a) ordinis sancti Benedicti pragen(sis) diocesis Salutem in domino et mandatis nostris ymmo verius apostolicis firmiter obedire Noueritis quod nuper sanctissimus in Christo pater et dominus noster dominus Johannes diuina prouidencia papa xxiij quandam commissionem siue supplicationem cedulam nobis per certum suum cursorem presentari fecit Cuius quidem cedule tenor de verbo ad verbum sequitur et est talis Clemens decretorum doctor et vnus ex singulis causarum et causarum appellacionum in Romana curia vertentium auditoribus in causa que coram vobis vertitur seu verti speratur inter venerabilem virum dominum Johannem monachum professum monasterij in Sazaw(a) ordinis sancti Benedicti pragen(sis) diocesis ex vna et reuerendum in Christo patrem dominum .. Abbatem dicti monasterij ex altera partibus super quibusdam grauaminibus sibi per dictum dominum Abbatem illatis et eorum occasione ad dictam curiam legitime deuolutis necnon in ea de iure necessitatis tractandis seu finiendis Attentis quod partes appellate appellacionibus ipsis et earum causis prosequendis in dicta curia non obstantibus ipsis in eadem curia prosequi non curant sed in partibus de facto procedunt in preiudicium dicti appellantis et dicte curie contemptum Vobis committimus et mandamus quatinus vocatis qui fuerint euocandi et auditis hincinde propositis quod iustum fuerit decernatis facientes quod decreueritis per censuram ecclesiasticam firmiter obseruari Testes autem qui fuerint nominati si se gracia odio vel timore subtraxerint per censuram eandem appellacione postposita compellatis veritati testimonium perhibere Datum Rome apud sanctum petrum viij kalendas Aprilis pontificatus nostri anno primo Post cuius quidem cedule presentacionem et recepcionem per nos et de ea factam fuimus pro parte dicti domini Johannis monachi principalis in eadem cedula principaliter nominati debita cum instancia requisiti quatinus ad execucionem dicte commissionis et contentorum in ea procedere dignaremur Nos igitur Clemens auditor et iudex prefatus attendentes requisicionem huiusmodi fore iustam et racioni consonam volentesque mandatum apostolicum nobis in hac parte directum reuerenter exequi vt tenemur Idcirco vobis et cuilibet vestrum in virtute sancte obediencie et sub excommunicacionis pena quam in vos et quemlibet vestrum si mandatis nostris huiusmodi non parueritis cum effectu ferimus in hijs scriptis districte precipiendo mandamus quatinus infra sex dies post recepcionem presencium quorum duos pro primo duos pro secundo et reliquos duos dies vobis et cuilibet vestrum pro tercio et peremptorio termino ac monicione canonica assignamus ad prefatum dominum .. Abbatem monasterij in Sazaw(a) personaliter accedatis eique intimetis et insinuetis dictam commissionem et omnia et singula in ea contenta ac ipsum ex parte dicti domini nostri pape et nostra moneatis et requiratis quem nos eciam tenore presencium monemus et requirimus quatinus infra quindecim dies post intimacionem et insinuacionem huiusmodi sibi per vos vel alterum vestrum factam de quibus quindecim diebus quinque pro primo quinque pro secundo et reliquos quinque dies sibi pro tercio et peremptorio termino ac monicione canonica assignamus in dicta Romana curia per se vel procuratorem suum legitimum coram nobis compareat in causa et causis huiusmodi legitime processurus et iuri pariturus facturusque et recepturus quod iusticia suadebit Alioquin siue compareat siue non nos in dicta causa et causis ad vlteriora procedemus prout de iure fuerit faciendum absencia siue contumacia sua in aliquo non obstante Insuper vobis et cuilibet vestrum in virtute sancte obediencie et sub pena excommunicacionis late sentencie quam in vos et quemlibet vestrum si mandatis nostris huiusmodi non parueritis cum effectu ferimus in hijs scriptis districte precipiendo mandamus quatinus omnes et singulos testes per dictum dominum Johannem monachum principalem vel eius procuratorem vobis nominandos si se gracia odio vel timore subtraxerint per censuram ecclesiasticam appellacione postposita compellatis veritati testimonium perhibere Et quid in premissis feceritis nos de eo per vestras patentes litteras harum seriem continentes vel per instrumentum publicum certificare curetis In quorum omnium et singulorum fidem et testimonium premissorum presentes litteras siue presens publicum instrumentum per notarium publicum infrascriptum scribi et publicari mandauimus nostrique sigilli iussimus appensione communiri Datum et actum Rome in domo habitacionis nostre sub anno a natiuitate domini Millesimo quadringentesimo quintodecimo Indiccione octaua die vero Jouis vicesimanona mensis Aprilis pontificatus sanctissimi in Christo patris et domini nostri domini Johannis diuina prouidencia pape xxiij anno quinto presentibus ibidem discretis viris magistris Johanne martini et Johanne longini notarijs publicis clericis pragen(sis) et clocoren(sis) diocesium testibus ad premissa vocatis specialiter et rogatis
Et ego Jacobus Lote clericus wratizlauien(sis) diocesis publicus apostolica et imperiali auctoritatibus notarius et coram reuerendo patre domino Clemente iudice et auditore prefato in causa et causis huiusmodi scriba Quia dicte commissionis presentacioni et recepcioni ac omnibus alijs et singulis premissis dum sic vt premittitur per dictum dominum Clementem auditorem fierent et agerentur vna cum prenominatis testibus presens interfui eaque omnia et singula sic fieri vidi et audiui Ideoque hoc presens publicum instrumentum per alium fideliter scriptum exinde confeci subscripsi et publicaui et in hanc publicam formam redegi signoque et nomine meis solitis et consuetis vna cum appensione sigilli prefati domini auditoris signaui rogatus et requisitus in fidem et testimonium omnium et singulorum premissorum