Wir Francz vom Rosental Richter Buhard von Goblowicz Castan fleischer Schepfenmeister zu den czeiten Hannan
Eder Andres polner Hanuschco vom pist Hanns Spisglas Castan Goldsmid lubem(us) Wenczlaw Thobie Hanns steinsnik
Ayge Caspar Girs Hanns Cammer petrus Crempniczer Jeronim(us) von passaw Her greuser Mertem Kreydl Johannes
Hutreytter Castan fleischer Petrus krebs Vnd dy andern Schepfen gemeynlich des Berges zum Chutten Bekennen Vnd tun
kunt mit disem brieff allen den die In sehen ader horn lezen das fur vns kumen ist in einen vollen Rat do alle ding crafft Vnd
macht nemen vnd behalden der Erber Mykulawss von losthans gesessen zum Hohredl vnser liber mitburg Vnd hat bekant
mit wolbedachtem mut Williklich Vnbetwungen von aller seiner erben vnd nachkumlingen wegen Wy das er recht vnd
redlich vorkaufft vnd aufgeben habe vorkaufft vnd aufgibt In crafft dis brifes Vff seinen hof vnd erbe gelegen zum Hohredl
in Colner kreys der etwenn des Ganken seines Vaters ist gewesen Vnd auf allen vnd yclichen seinen nuczen Vnd zugehorungen
mit Welichen namen dy genant mugen werden drey schok guter grosser prager muncze Jerlichs vnd ewiges czinsse der erbern
frawn Anne etwenn des Wenczlaw Jungen hawssfrawn vnd iren erben Vmb dreyßig schok guter gross dy diselb fraw Anna dem
obgenan(ten) Mykulassen mit bereytem gelde gericht hat Vnd bezalt zu geben vnd zu zinsen ein halfenteyl disselben czins das ist ander
halb schok guter grossen prager muncz auff sant Gallen tag der am nesten kumet Vnd das ander halfenteyl das sint auch ander
halb schok der eynan(ten) gross auff sant Jurgen tag der darnach am nesten volget vnvorczogenlich Vnd alszuztun Vnd zu zinsen
auf diselben czinsteye Jerlich Vnd ewklich als ains recht ist In zukunfftigen czeiten Wer den sach das dy besiczer des eynan(ten) hofs
Vnd Erbes zum Hohredl dy nu sein ader In czeiten sein werden an bezalung des obgenan(ten) czinses sawmig Wurden zu Welichem
czinstag das geschice do got fur sey So sol zu hant auf ein itlich schok gross des vorseßen czins alle wochen dy Weil der czins
vnvorzolden ist siben groschen zu rechter czinsbus geen vnd Wachßen Wenn denn dy obgenan(te) Anna ader der disen brieff
mit iren guten Willen haben wirt des vorseßen czinses mitsampt den pussen dy darauf gangen vnd gewachsen Weren
nicht lenger beyten noch enbern Wolde So mag si mit eygner crafft mit Hulf des Richters vnd der Schepfen des Berges
zum Chutten dy In czeiten sein werden ader mit macht aller vnd yclicher der si darzu genisen mag den obgenan(ten) hoff Vnd
Erbe zum Hohredl Vnd alle seine Varende vnd vnvarende habe pfenden diselben pfant treyben tragen furen zu dorf eagen
zu vorkauffen geteilt ader mitenander Vnder cristen ader Juden an auffgebot eines ytlichen gerichtes mit Vollen rechten
Vnd das zo offt zutun als offt der czins mit seinen pussen zu seinen gewonlichen czinstegen von den besiczern desselben
hoffs Vnd erbe zum Hohredl bleibe vnvorzolden Auch sunderlich zugelegt Wenn dy besiczer des vilgenan(ten) hoffs vnd erbe
zum Hohredl dy nu sein ader In czeiten sein werden einen andern ewigen czins drey schok guter gross auff einen andern erbe das
do In einer meyl vmb den Berge gelegen ist kauffen Vnd ewigen daran sich dy eynan(te) Anna lest genugen So sol der eynan(te)
hoff Vnd erbe zum Hohredl mit allen seinen zugehorungen furvas des obgenan(ten) czinses frey sein vnd ledig Vnd Wer den
gegenWortigen brieff mit irem guten Willen hat dem geburn alle vorgeschribene recht diser sach zugeczewgnisse
Vnd zu einer steten Vnd ewigen sicherheit haben Wir obgenan(ten) Richter Vnd Schepfen Vnser Gemeyn Insigel das
gross gehenget an disen Brieff der do geschriben ist Nach Cristi Geburt Virczehenhundert Jar darnach In
dem Cwelften Jaren Nach philippi Vnd Jacobe tag der heiligen Cwelfboten am Mitwochen