Ich Margt Lantgrefinne von Leutenb(er)ch v(er)gich an disem b(ri)ef vnd tůn chund allen die in sehent oder horen lesen daz ich in gůtem gesunt
mit wolbedachtem mvt die weil vnd ich ez wol getůn mocht mit gunst vnd mit rate meines libn wirtes h(er)n Johans Lantgrafen
von Leutenb(er)g ein gescheft vnd ein testament gestift vnd gemacht habe von den fvmf hvndert schoken grosser die mir d(er) genant
mein wirt ze einem morgengab gegebn hat vnd auch swas ich von gestein vnd perleyn vnd gewande vnd von anderm hausgeret von
golt oder von silber von mein libn gebrůdern gehabt han also beschaidenlichen swenne got vber mich gebiut vnd ich sterbe so sulln
drei hvndert schok grosser meinem chind ob mich des got mit gesunt genesen lat ez sei ein sun oder ein tochter vnd mich vberlebt ledichlichn
gevallen sturbe ab(er) daz selbe chind auch des got nicht engeb so schaffe ich daz d(er) selbn drey hvndert schok zway hvndert schok grosser
d(em) genanten meinem libn wirt schullen gevallen vnd daz dritet hvndert schok gross(er) schaffe ich d(em) closter zu chrumenav daz nv newes in
vnser frowen ere gestift ist fůr mein sel vnd fůr mein vord(er)n dar zv schaffe ich sunderlichen zu dem selbn closter zu chrumenav achtzig
schok grosser dar zu schaffe ich zu dem clost(er) gen hochenfurt darinne ich p(ri)gruft gewelt han fvmfzig schok gross(er) Ich schaffe auch
daz man fůr fvmf vnd zweinzig schok grosser chouff allerley bereit(er) schaft von wachs vnd von chreutz(e)n vnd zu dem opffer die
zu d(er) p(ri)gruft gehoren do mit man mich bestetig zu d(er) erden So schaffe ich auch oftgenantem meinem libn wirt zu einer gedechtnusse
alle silbiryn amkvas vnd silb(er)n schussel mit anderm hausgeret die mir d(er) genant mein lib gebrůder von rosenb(er)ch habn gegebn
So schaffe ich auch d(em) genanten meinem chind wirt ez ein tochterleyn mein best chrangel mit dem besten burtel vnd agnesen meiner
swester tochter von d(er) lipen die beste gurtel die ich han wer ab(er) daz got geb daz mein oftgenant chind wirt ein chnechel dasselbe
best chrangel vnd burtel sol gegebn w(er)den d(er) genanten agnesen von d(er) leypen fůr die gurtel vnd die selb gurtel sulln mein libn ge
brůder von rosenb(er)ch mit and(er)n mein p(er)leyn vnd mit mein gewande vnd sloyern also getailn alz ich si bey irm caplan h(er)n
zachariasen von walserhin den si zu den stunden zu mir gesant haten han gepeten demne alz vil daz ze aht iunkvrowen chleidern
von hach mein nvmmerer gurtel sol w(er)den vnd d(er) iunkvrowen die ir phligt mein rot gewand an furleyn mit solch(er) chursen alz
ich d(er) genanten mein gebrůdern von rosenb(er)ch hab enboten Ich schaffe daz man meiner altvrowen d(er) katrein geb zehen schok
grosser vnd Jvnekvrowen witoslabn fvmfzehen schok grosser vnd dorothen zehen schok grosser vnd margreten zehen schok gross(er)
Ich bite auch daz d(er) zweyr guldener tůcher die mir vor genant mein liber wirt gegebn hat eins gegebn w(er)de zu gedechtnuss
meinem libn brůder h(er)n pet(er)n von rosenb(er)ch vnd daz ander tuch vorgenanten agnesen mein swest(er) tochter von d(er) lypen
vnd daz dise testament vnd mein geschefte ein furgank habe han ich zu einer gedechtnusse disen b(ri)ef gemacht vnd vsigele mit
meinem anhangunden Ingesigel der gegebn ist ze hůtsporck nach cristus gepůrde dreuzehen hvndert jar dar nach
in dem sibenden vnd fvmfzigistem jar an dem nasten sunntag vor sand thome des heiligen zwelfpoten tag