Wir Fridreich von gotes gnaden Herczog ze Osterreich ze Steyr ze Kernden vnd ze Krain Graue ze Tyrol (et)c(etera) Bekennen
Als der Edl vns besunderlieber her Vlreich von Rosenberg obrister Burggraue zu Prag sich gen vns verschriben
hat Wenn der allerdurchleuchtigiste furste vns gnediger herre her Sigmund Romischer zu Vngern vnd ze Beheim (et)c(etera)
Kunig mit dem tod abgeet das dann wir oder ainer vnser lieben vettern herczog Ernsts seligen Sune die wir Innehaben
oder vns Sun zu Kunige zu Beheim sullen aufgenomen werden als das dann die brieue die wir darumb gen einander
gegeben haben aigenlicher begreiffent Also haben wir fur vns dieselben vns liebe vettern vnser Sun vnd Erben gelobt
vnd versprochen alsverre wir das billich vnd von Rechts wegen tun sullen oder mugen wissentlich mit dem brieue Das
der egnant vns gnediger h(er)r der Romisch Kunig dem vorgeschriben hern Vlreichen von Rosenberg von der Kron ze Beheim
versaczt gegeben oder verschriben hiete es wer vmb geltschuld dienste von gnaden oder in ander wege oder das derselb von
Rosenberg vmb sein gelt vnd gut in sein gewalt bracht oder geloset hiete darumb er dann des obgenanten vns(er)s herren
des Kunigs brieue hat daz wir In nach ausweisung derselben brieue dabej gnediclich wellen lassen beliben durch der ge=
trewn vnd willigen dienste willen damit sich derselb von Rosenberg gen vns erboten hat vnd die er vns hinfur tun sol
an alle geuerde Mit vrkund diczs brieues Geben ze Insprugg an sand Matheus tag des heiligen zwelfboten vnd
Ewangelisten Nach Cristigeburde im vierczehenhundert vnd ainunddreissigisten Jare
.d. d. p(er) Vl(ri)c(um) a(n)n(um)