Wir gräfe Symont von Thierstein Tůn kunt allen den die disen brief ansehent oder hörent lesen Daz wir und der edel Wolfrant von Brandis ein
ander über ein kômen sint Daz wir bedenthalp nach Gotes ordnunge recht und redelich mit unsern fründen mit der Gotes e zů enander griffen und
kômen süllen und wellen Also daz wir gräfe Symont von thierstein geben süllen und wellen Clementen unser eliche tochter ze einem elichen wibe
Wolfrant von Brandis des egen(anten) Wolfrantz sun Und sol och der selbe Wolfrant den selben sun sin geben der egen(anten) Clementen unser
tochter zů einem elichen manne Und söllent si also elich und redelich zů legen In dem nächsten halben Jare Wenne es dewederteil an den andern
verbert Und ob wir enbären wil Daz wir och ze bedenteilen gesworn hant gen solgen ane geuärde Sol man wissen Daz wir der vorgen(anten) Symont von thier
stein der egen(anten) Clementen unser tochter gelobt hant recht und redelich und geloben mit disem briefe Druzëhen hundert guldin von florenz gůter und
swär ze rächter estür zů dem vorgen(anten) Wolfrant von Brandis dem iungen Und binden och da zů unser erbn Und sönt och die selbe estür usrichten
und weren dem edeln h(er)n Bërchtolt von Grünenb(er)g iun(er)n h(er)n Pët(er) von Grünenb(er)g und h(er)n Burckart spæt von Eptingen sinen halp in der Jarsrist so die
egen(anten) wolfrant der iunge und clemente unser tochter bienander geslaffen hant Und halp damanchin über ein Jar Die och daz selbe gůt nach iet
weden gil dar nach so es in ir gewalt kômet unuzogenlich anlegen und bewenden sönt der selben unser tochter an nutzliche gůte und gelt in estür
wise dar an si und ire erbn habend sien und nach estür recht ane geuärde Und ob da vor Gôt si daz iender den selben von Grünenb(er)g oder h(er)n Burckart spæt
eins oder me da zwüschent abegienge So sönt wir die selbe estür tůn und antwurten an drier and(er)n erber mannen gewalt die wir von bedenteilen dar zů
erkiesen Die och daz selbe nach ietweden gil dar nach so es in ir gewalt kômet anlegen und bewenden sönt der vorgen(anten) clementen uns(er) tocht(er) und iren
erben in estür wise als vargeschriben stat Und ze merer sicherheit daz wir der vorgen(anten) gräfe Symont von thierstein und unser erbn der egen(anten) clemencen
unser tochter und iren erben usrichten und wërn die vorgen(anten) druzëhen hundert guldin estür halp in der Jarsrist so si bi dem egen(anten) wolfrant geslaffen
hat und halp damanchin über ein Jar als vargeschriben stat So hant wir inen ze rächte gesworn bürgen geben zů uns unbescheidenlich die edeln herren
gräfe Růdolf von Nüwenburg hërre und gräfe ze Nydöw und ze froburg uns(er) swäh(er) Gräf Egen von friburg h(er)n Johans von friburg gräf Johans von
Arberg hërre ze Valënsis hërn Johans von Nânt h(er)n Pëter von Grünenb(er)g den vorgen(anten) h(er)n Cůnrat den münch von aschinchenstein h(er)n Burckart spæt von
eptingen den vorgen(anten) h(er)n Hartman von eptingen h(er)n Hainrich von tættenwiler h(er)n Jůcolt von frigke h(er)n Jacob von kienb(er)g h(er)n Hëman münch von aschin
chenstein h(er)n Jůdeman den schäler ritt(er) und Cůntzeman půlant von eptingen edeln knëcht uss ir solicher bescheidenheit und den gedingen Daz daz
wir der vorgen(anten) gräf Symont von thierstein oder unser erben sumig wurden an usrichtunge der vorgen(anten) estür der Druzëhen hundert guldin zů den
zwein ziln als vor bescheiden ist Wenne wir denne und die vorgen(anten) bürgen dar umb gemant werdent von dem vorgen(anten) Wolfrant von Brandis von wolf
rant sinen sune an der vorgen(anten) ir(er) tochter nâmen von ir eim oder von iren botten ze huse ze hofe oder under ougen von munde oder mit briefen so sönt
wir inlest der mânunge in den nächsten sëchze tagen ze Basel oder ze Emsalden widenthalp unser iegelicher denne uns rächte gewonlich giselscaft leisten
in offem wirt huse ze reitem kouffe und ze rächten mâlen tegelich unuzogen bi geswornen eiden so wir alle har umb getân hant gen solgen mit usgereckten
händen und gelerten worten Und weler under uns dise giselscaft nüt leisten möcht oder enwölte der sol und můz einen erbn knëcht mit eim müssigen phërde
an sin stat legen der ze rächten mâlen als vil zere als ër ane geuärde Und also bi den selben eiden niemer von dirre giselscaft ze lasende unz an die stunde
daz die vorgen(anten) estür so vil so ir denne geuallen ist oder dar umb denne gemant ist gâr und gäntzlich wirt usgerecht und gewert als vargeschriben stat Und
och daz der vorgen(anten) bürgen deheiner stürbe oder abegienge e dise estür usgerichtet wurde als vor bescheiden ist So sönt wir der vorgen(anten) Gräfe Symont von
thierstein und unser erbn inen ze eimen and(er)n bürgen gëben als gůten âne geuärde In den nächsten vierzëhen tagen dar nâch so es an uns gewerbt wirt Tůten
wir des nüt Wenne wir denne und die and(er)n bürgen so denne lëbent dar umb gemant werdent als vargeschriben stat so sönt wir ze Basel oder ze Emsalden ze
gelicher wise dar umbe ligen und leisten bi den selbn eiden als umb die estür da vargeschriben stat Als lange unz daz man ein and(er)n bürge in an des stat
so denne abegangen ist gëben wirt als gůt âne geuärde Wir der vorgen(anten) gräf Symont von thierstein hant och gelobt bi gůten trüwen disen brief stæte ze
habende Und och die vorgen(anten) bürgen ire erbn und nâchkômen von allem schaden ze tůnde in den si kômen von dirre vorgen(anten) bürgschaft und giselscaft und
giselscaft wëgen oder kômen möchten in deheinen wëg und binden och da zů alle unser gůt âne alle geuärde Dar über ze einem stæten wâren urkünde dirre vargeschri
bingen so hant wir gräfe Symont von thierstein der vorgen(anten) unser Ingesigel gehanken an disen brief Und wir die vorgen(anten) bürgen gräf Růdolf von Nüwenb(er)g
hërre ze Nydöw und ze froburg gräfe Egen von friburg h(er)n Johans von friburg gräfe Johans von Arberg hërre ze Valënsis Johans von Nânt Pëter von
Grünenb(er)g Cůnrat münch von aschinchenstein Burckart spæt von eptingen Hartman von eptingen Hainrich von tættenwiler Jůcolt von frigke Jacob von
kienb(er)g Hëman münch von aschinchenstein Jůdeman schäler ritt(er) und Cůntzeman půlant von eptingen edel knëcht Veriehent och alles des so da vor von uns ge
schriben stat Und hant es och gelobt weste und stæte ze habende âne alle geuärde bi geswornen eiden so wir hâr umbe getân hant gen solgen Und des ze mer
sicherheit so hant wir och unser Ingesigele gehanken an disen brief Der gëben wirt ze Basel an dem nächsten Dornstâge vor aschermitwochen An dem Jâre
dô man zalte von Gotes gebürte Druzëhen hundert sëchzëg und aht Jâre