Wir Johans von Luchtenburch Herr zu Vessow tun kunt offenbar an disem brief allen den di in sehen horen oder lesen daz wir
von der heirat wegen di da qwischen unserm sunken und Juncfrawen Sygismund hern Franken tochter von Chunowiz recht
und redlich gestift und geschehen ist als daz in den briefen di dar uber gemacht und geben seint lautterlicher begriffen ist
von dem vorgenanten hern hern Franken zu rechtem egelt und zu rechter morgengab anphangen haben czwayhundert march
gutter pfenning pragersch aycherisch zal und werung an beraytem gelt Also beschaidenlich ob daz wer daz der egen(anten) chinder
ains oder bayde daz got nicht angeb abgiengen von todes wegen ee wan si mit gewonlicher hochzeit zusam(en) komen So gelo
ben wir Johans der egen(ante) vor uns vor unser erben und vor unser nachkumling Hynko Tumherr zu olom(ucz) und Gorg bru
der von Luchtenburch hern zu Vessow und Hynz von der Lipen des chunigreichs zu Beheym obrist marschalk mit gesumpt hant un
verschaidenlich und ungesundert mit guten trewn in alle arglist daz wir dem egen(anten) hern Franken und seinen erben und
mit namen zu getrew hant den wirdigen mannen und hern hern Wenczlaben dem probst zu chunig(gratz) und hern Vlrichen Tumhern
zu olomucz und zu Brunn seinen brudern und den edeln hern hern Beness von chrawarn genant von strasnicz und hern Syriqlaben
von schellenberg di egen(anten) czwayhundert march widerkeren sullen und bezalen mit gutten pfenning der egen(anten) und legen auf der drayer
sloßen aine welch uns von in gezaiget wirt gen chunowiz oder gen tempelstain oder gen strasnicz von dem tag als der chinder
ains weliches daz wer abgieng uber czway gancz Jar nachainand(er) zu zalen an alles verziehen und alles geuerd Teten wir des
nicht so sullen zu hant unser czwen di da von den egen(anten) hern oder ir ainem gemant werden czwen erberg rittmessig diener an ir stat
mit czwayn chnechten und mit vier pharden inreiten gen Brunn in di stat in ains erbn mans haus daz in von denselben hern oder ainem
beweist wirt dar inn zu halden und zu laisten ein rechtes und ein gewonliches inlag als inligens und laistens recht ist und gewon
hayt und ob dazselb gelt in vierzehen tagen nachainand(er) nach der manung dannoch nicht bezalt wurd man laist oder man laist
nicht daz si dann di egen(anten) hern oder ir ieglicher zuhant vollen gewalt haben daz egen(ante) gelt der czwayhundert march zu nemen
auf uns aller schaden mit gesumpt hant zu Juden und zu christen und dannoch so sol daz egen(ante) inlag gehalden werden unversert und
ungeruit belayben also lang unz daz wir den vorgenanten hern di obgen(anten) czwayhundert march mit allen und ieglichen iren schaden in
weltlicherlay weys si da von mercklich und beweyslich komen wern gancz und gar verrichten an alle widerred gaistlichs oder werlt
lichs rechten Des geben wir in disen brief versigelten mit unserm anhangenden Insgeln der geben ist nach christus gepurt Tausent
Jar dreyhundert Jar und dar nach in dem ain und sibenczigistem Jar an der nechsten mitwochen nach sand peter und sand pauls
tag der heyligen czwelfpoten