Wir Graf Johans Graf Růdolf. Vnd Graf Gotfrie von Habsburg gebrůder Tůn kunt vnd veriehen Allen den die disen brief ansehent lesent oder horent lesen Das wir mit gůtem rate vnser
frúnden vnd dienern vmb lieplichen tåding lieplich vnd gůtlich vnd einhelleklichen sint miteinånder vber ein komen an solicher wise vnd bescheidenheit als hie nach geschriben ist. Des ersten so ist mir
dem egnanten Graf Johansen von Habsburg ze mime teil worden vnd gevallen. Die stat ze Rapperswile gelegen bi Zúrich. stete vnd wis zů der selben stat des daves gelegen ist. Vnd mit angestos
mit allen rechten gerichten vnd nůtzen so dar zů gehorent. Vnd gehort zů dem selben mime teil. Das phant ze Glarus gúlter gerúste. húnder vnd zehen phunt gůt vnd genem zúricher múnze vnd das
ist phant von den hochgebornen fúrsten vns(er)n h(er)ren den Herzogen von Ost(er)rich vmb vier húndert mark silbers. Jch vnd min erben múgent das wider an vns losen wenne wir wellent oder múgent alle die phand
die vns(er) vatter oder wir die egnant gebrůd(er) versetzet hånt. Die bi der selben stat des daves vnd der stat ze Rapperswile gelegen sint Jch vnd min erben hånt d(er) gewalt ze losende. Griffenberch die burg
vnd das dar zů gehort. Vnd das vischen in dem alle wasser vnd in dem brůd(er) vnd in erben ane geuår wand die selben phant och zů minem teil gehorent vnd mir gevall(e)n sint. Gegen disem vorgeschribnen
teil. also ist mir dem obgenanten Graf Růdolf von Habsburg ze rechtem teil worden vnd gevallen Die burg vnd die stat stat ze Loffenberg mit allen rechten gerichten vnd nůtzen vnd was dar zů ho(re)t
es si vogtye aigen lehen erbe oder wie gůt gescheffen vnd genempt ist. vnd als es gelegen ist. Vnd(er) zů so sint mir gevallen. alle die phant gůt die nidewendig vnd gússibent oder nidewendig d(er) Aren vnd d(er)
flúche gelegen sint. vnd von vns oder vnser vatter d(er) pfetzet sint Vnd súllent och ich oder min erben die sond(er) an vns losen wenne wir wellent oder múgent ane alle irrung vnd wid(er)rede d(er) vorigen min(er)
brůd(er) vnd ir erben. wand die och an minem recht hånt noch haben súllent. Och ist mir ze teil gevallen. die Graffschaft in dem Klegow als si vns ankomen ist. Vnd ein gůt ist gelegen ze Eynach Das vns(er)n
vlrich trueman von Růwe von vns ze phande håt. hort och ze minem teil. das ich och oder min erben. vnd nieman anders losen súllent. Och ist die burg ze Hertenach mit allen dem so dart zů gehort mir ze
teile worden vnd gevallen. Vnd súllent och ich oder min erben die sond(er) losen. so wir wellent oder múgent Vnd sol och ich der selbe Graff Růdolf oder min erben ob ich nůt tůt verschiht vsrichten vnd geben pro
Agnesen min(er) swester tůmsrow ze Seckingen vierzehen mark gelts in phennigen oder mit korne als den bescheidenlich ist die wile si lebt. wand swenne si nůt enist vnd erstirbet. so sol mir vnd minen
erben das gelt gar ledig sin vnd ensullen dar vmb deime nieman nútzt me gebunden noch haft sin. ane alle geuår. Vnd wand mir dem egnant Graf Růdolf dirre vorgeschriben teil als er vor begriffen
vnd vnderscheiden ist. gevallen vnd worden ist. Dar vmb so habe ich zegeben gericht vnd geuår. an die gůt schúlden. so ich vnd min egnant brůd(er) gemeinlich alle die schúldig wårent. vier tůsent an
drú húndert guldin von florentz. mins aignen gůtes. Vnd och wir die vorgen(ant) Graf Johans. vnd Graf Gotfrie offenlich viehent. Och ist gegen disen vorgeschriben teiln mir dem obgenant Graff Gotfrie von
Habsburg ze rechte teil worden die alte Rapperswile. vnd die march vnd daz tal ze wåge. das da bi gelegen ist. bi dem zúrich sewe. mit allen rechten gerichten vnd nůtzen. twingen vnd benne so dar
zů gehorent. Vnd måg och ich oder min erben wol losen alle die gůter. die zů der selben stat des daves gelegen sint. vnd von vns(er)n vatter oder von vns gebrůd(er)n pfetzet vnd v(er)kúmbert sint. Vnd sol och ich vn(d)
min erben. haben die stat ze Kúsnac vnd die Graffschaft in dem Klegow. mit allen rechten gerichten vnd nůtzen. twingen vnd bennen so dar zů gehorent ane alle irrung vnd wid(er)rede d(er) obgenant(en) min(er) brůd(er)
vnd ir erben. wand mir dz alles ze teil worden ist. Wir die vorgen(ant) gebrůder Grauen von Habsburg håben vns allen drín. ze gemeinem teil. gemeinlich behabt alle die lehen die von vns lehen sint. Also das
wir alle die wile die da von vallent. ane die ercheissen oder genempt sint. gemeinlich miteinånder niessen súllent. vnd in vnser aller gemeinen nutze vnd notdurft kumen súnt bi gůten trůwen ane alle geuår
Wer och sint wir och alle drie gemeinlich vber ein komen vnd hånt fúr vns ze helgen gesworn. Vnd des vns dehein lehen. das von vns lehen ist. niemer gemeinlich ledig wúrde. vnd wir es d(er) staft mit
fúrter lihen soltent. noch gebunden wåren ze lihende. Das vnser enkeiner denne daz selbe lehen. das vmb denne also ledig worden ist. nieman anders fúrbas lihen sol ane des and(er)n zweier vnserre brůd(er) gůten willen gúnst
vnd wissende. ane geuår. Doch geschiht es das dehein lehen. das von vns lehen ledig wúrde. vnd wir es and(er)s lúten vnd pflegen an die es denne d(er) staft gevall(e)n vnd lihen soltent. sint ditz das geschiht
die selben lehen sol vnd måg d(er) elst vnder vns gebrůd(er)n lihen. doch in vnser aller nåmen vnd sol och er bi dem vorgeschriben eide. von dem d(er) denne die lehen von im enpfahet. swen ein nůmen vnd heissen
swern das er vns allen gemeinlich vnd ieclichem sunderlich von des selben lehens wegen. gehorsam si ze dienende. vnd ze wartende. als ein man sime h(er)ren von sins lehens wegen. billich dienet vnd wartet sol. wand
vns allen die månschaft gelich behalten sin sol. alle die wile. wir die selben lehen nůt geteilt hånt. Wir håben och vngedeilt gelassen. vnd zů vns(er)n gemeinem teil behabt. die rachtung vnd ansprach die
wir håben. zů der veste Hambu(r)g wie ditz gescheissen oder genempt ist. das dar zů gehort. Das hånt wir vngedeilt gelassen behlten den gelle ze schúlen. vnd das gůt ze v(er)kúmbern das och nach vnser vnd
vns(er)r erben aller. gemein ist. Wir die vorgen(ant) gebrůdere tůnt och fúr vns vnd vnser erben das wir alle gegen einånder. gelobt håben vnd geloben. och mit disem brieff das wir alle gemeinliche
vnd ieclicher in sonders dem and(er)n. råten vnd helffen solnt. als v(er)re als wir alle. oder deheiner. sunderlich fúmúgent. vns ze behaltende ze schirmende. vnd ze niessende alle die recht. nůtze vnd zůgehorden
die zů den vorgeschriben gemeinen gůt die wir vns ze gemeinen hånden. behabt hånt. von recht oder von gewonheit gehorent. in aller der wise vnd bescheidenheit. als si an vns komen sint. bi vns(er)n eiden die
wir dar vmb vnser ieclicher in sonders mit vffgehaben hånden vnd gelerten worten gesworn hånt ane alle geuår. Vnd wand die vorgeschriben teilung vnd ordnunge geschehent vmb ewigen gebrůd(er)n. mit gůtem
rate vnd wolbedachteklich. willeclich. inhellekclich vnd gůtlich beschehen ist. So viehen wir alle gegen ein ander. vnd ieclicher in sonders. fúr vns vnd fúr vnser erben. vnd erkennent vns das dise teilunge
vnd ordnunge. vngeuårclich. vnd vnwid(er)rúflich vollegangen vnd beschehen ist. Vnd sol vnd wil och vnser ieclichen vnd sin erben wol benúgen an dem teile d(er) ime gevallen ist als vor geschriben stat. Vnd
dar vmb so geloben wir die obgenant(en) Gråue von Habsburg. fúr vns vnd fúr vnser erben. gemeinlich vnd ieclicher in sond(er). gegen dem and(er)n disen teil vnd ordnunge stete ze håbende also das vnser enkeiner den
and(er)n. vmb sinen teil. niemer ansprechen. angriffen. bekúmb(er)n gesúmen noch beswåren sol in deheinen weg Vnd geloben hie wider niemer ze tůnde. noch ze komende. wed(er) mit. Geisten noch mit. leysen rechten
wed(er) mit geistlichem noch mit weltlichem rechte noch gerichte. noch mit kåm(er)rechte stattrechte. noch burgrechte swande wår. vmb des alles. vnd gemeinliche. aller der dinge schirmunge vnd tedingen. vnd aller
der fúnden. die nu fúnden sint. oder ie nach fúnden vnd erdåcht wúrden. wie si geheissen. oder genempt sint. Vnd nieman alls oder. etliches vnder vns. wider dise teilunge vnd ordnunge iemer getůn kůnden
oder mochtent. oder ieman anders in vns(er)n wegen. wissentlich vnd bedåchtetclich vzgen hånt. fúr vns vnd vnser erben. ane alle geuår. Vnd ze einem offenen wåren vrkúnde aller dirre dinge. so haben
wir die obgenant(en) gebrůd(er) von Habsburg. iegelicher sin aigen Jngesigel gehenket an disen brief. wand och vns(er) ieclicher des briefs einen gelichen brief håt. Och hånt wir die selben gebrůd(er) durch mere ge
zúgknus vnd sicherheit dirre teilung erbeten. vns(er)n lieben oheime. Graff Johansen von Fúrstenberg. vnd vns(er) getrúwen h(er)n Húg von Gůtemb(er)g ein frien h(er)ren. vnd h(er)n Cůnrat von abtmalz ein ritt(er) die och
bi der tåding wårent. Das si och ir Jngesigele gehenket hånt an disen selben brief. Vnd Graff Johans von Fúrstenberg. Húg von Gůtemb(er)g ein frie. vnd Cůnrat von abtmalz ritt(er). viehent das wir alle bi
der vorgeschriben teilunge vnd ordnunge gewesen sint von d(er) obgenant(en) gebrůd(er)n. d(er) grauen von Habsburg aller bette wågen. Vnd dar vmb so håben wir och vns(er) aigene Jngesigele gehenket an disen
gegenwúrtigen brief. Der geben wart ze Loffenberg. an dem nechsten Zinstag nach sant Johans tage ze Súngiessen. des Jars do man zalte von gottes gebúrte. Drúzehen húndert vnd vier vnd
fúnfzig Jar ^?^