Ich Eymbrecht d(er) Zovmrvde purger ze wienn vnd ich Christein sein hovsfrowe wir veriehen vnd tuen chvnt offenleich an disem prif allen den
die in sehent lesent oder horent lesen die nv lebent vnd hernach chvmftig sint daz wir mit wol verdachtem muete mit zeitigem rat
te mit vnser paider erben gueten willen vnd gunst ze der zeit do wir ez mit gesamter hant wol getven mochten vnd mit vnsers
perherren hant h(er)n Chvnrates dez Nvzdorfer rehte vnd redleich haben verchovft vnser lediges vnd vnuerchvmmertes erbe ein
halbes levch weingarten an dem Nvzberge ze naest h(er)n Wolfhartes weingarten von der Ygla vnd haist d(er) lange chvfel do man
alle iar von dient in dem lesen ze rechtem perhreht den h(er)ren in daz chloster ze Haimburch fumf viertail weines vnd ander
halben wienn(er) phenning ze perhtreht vnd nicht me den selben weingarten hab wir rehte vnd redleich mit gesamter hant verchovft
mit alle dem nvtz vnd rehten als wir in vnd vnser vodern vnuerprochenleichen in rehter perhrehtes gewer her pracht haben vmb
vier vnd sibentzvch march silber wienn(er) gewichtes der wir schon vnd erleich verricht sein vnd gewert den edeln vnd erenwirdigen
h(er)ren h(er)n Petern von Rosenberch vnd der edeln vnd erbn frawen frawen Katreyn seiner hovsfrowen vnd allen irn erben fur
ein ledichleichen vnd freileichen ze haben vnd allen irn frumen d(a) mit ze schaffen versetzen verchoufen vnd geben wem si wellen an allen
irsat vnd an allen chrieg als ez in aller pest chome vnd fuege vnd durch pesser sicherhait willen so setze wir vns ich vorgenant(er)
Eymbrecht vnd ich eegenante Christein sein hovsfrowe mit sampt vnsern erben vnueschaidenleichen dem vorgenanten edeln vnd eren
wirdigen h(er)ren h(er)n Petern von Rosenberch vnd der edeln vnd erbn frawen frawen Katreyn seiner hovsfrowen vnd allen irn erben
vber den vorgenanten weingarten ze rechtem gewrn vnd schirm fur alle ansprach vnd fur allen chrieg als perhrehtes reht ist vnd dez
landes reht in Ostreich vnd waz in daz an abget oder abgienge daz schullen si haben ovf vns ovf vnser trewen vnd ovf alle
dem guete ez sei erbguet oder wie daz genant ist daz wir haben in dem lande ze Ostreich oder swa wir ez haben wir sein lebentig
oder tot daz lob wir in mit gesamter hant bei vnser trewen fuer vns vnd fuer alle vnser erben an allez geverde vnd an
alle argelist staete ze haben vnd ze laisten vnd geben in dar vber disen prif ze einem offen vrchvnde ze einem waren gezeuge
vnd ze einer ewigen vestnunge d(er) sache versigelt mit mein vorgenanten Eymbrechtes insigel vnd mit vnsers eegenanten perh(er)r(en)
h(er)ren insigel h(er)n Chvnrates dez Nvzdorfer vnd mit dez edeln h(er)ren h(er)n Neidharts insigel von Topel ze den zeiten lant
riht(er) in Osterreich vnd mit h(er)n Chvnrates dez chramestes insigel vnd ovch mit dez vorgenanten h(er)n Wolfhartes insigel von der
Ygla die diser sache gezeug sint mit irn anhangunden insigeln der prif ist geben ze wienn nach Christes gebuerde drev
zehen hvndert iar in dem dreizigesten iare an sant Gregorgen tag