Frater Jacobus de Milly Dei gratia Sacre domus hospitalis Sancti Johannis Jherosolimitani Magister humilis pauperumque Jhesu Christi Custos. Et nos Conuentus Rhodi domus eiusdem Capitulum Generale
Celebrantes Venerabili ac Religioso in Christo nobis precarissimo fratri Jodoco de Rozemberg Prioratus nostri Boemie Priori Salutem in domino sempiternam. Quamuis hec stabilimenta nostre Religionis declarent nichilominus
Suplicationibus vestrorum procuratorum videlicet fratris Nicolai niderber et Sebaldi puechl Coram nostro prefato generali Capitulo pro parte vestra expositis inclinati. Considerantes nullum alium in toto Regno Boemie
magis aptiorem et potentiorem consistere qui bona nostre Religionis per hussitas et hereticos aliasque personas Religiosas ecclesiasticas et seculares occupata usurpata et detenta non modo eripere sed extorquere valeat.
Tenore presentium Ex nostra certa scientia ac ex deliberatione nostri generalis Capituli vobis Venerabili Priori Auctoritatem potestatem et facultatem damus omnia et singula Castra loca villas preceptoria Res et
bona que fuerunt et sunt dicti prioratus occupata detenta usurpata per Principes dominos et quasuis alias personas cuiusuis gradus status conditionis existant petendi recuperandi eandem in proprietatem nostre
Religionis et dicti Prioratus Reducendi et incorporandi sicut primitus erant. Et quod fructibus eorundem bonorum vt premittitur recuperatorum siue recuperandorum vti frui gaudere valeatis sine solutione alicuius responsionis
ordinarie et alicuius alterius grauaminis impositi uel imponendi que fuissent temporibus preteritis consueta solui a preceptoribus preteritis earundem preceptoriarum recuperandarum. Et hoc Concedimus vobis tota vita vestra
durante vobis vero Priore vita functo volumus et ordinamus quod quecumque preceptorie prefacte Religionis resque et bona a uobis recuperata et extracta a manibus premissorum sint taxata ad soluendum responsione nostro communi
thesauro secundum communem cursum aliarum preceptoriarum prioratus prefati et quod huiusmodi gratia vobis facta ad successores vestros in dicto prioratu siue eiusdem preceptorijs nullatenus extendatur. Insuper cum pro parte
vestra etiam fuerit nostro prefato Capitulo expositum habere pluras terras siue agros minus vtiles seu in remotis partibus constitutos ex quibus nullum fructum vel paruum propter eorum distantiam seu in fertilitate
capere potestis. Et propinquiores agros seu terras reperiri ex quibus vtilitas et introitus caperentur meliores. Si vendendi illos steriles agros vel mutandi vtiles alienandi siue permutandi vobis facultas adesset
Ipsamque facultatem et potentiam premissa agendi dicti vestri procuratores nomine vestro poposcerunt. Agnoscientes nobilitatem Animi et prosapie vestre qua sumus certissime nullo malo dolo hoc postulare
Sed ardore potius et desiderio amplificandi prioratus prefati et Religionis nostre augendi famam desiderio ex toto vestro duximus annuendum. Dantes et concedentes huiusmodi Terras siue Agros steriles uel
parui valoris longinquos a Residentia vestra vendendi alienandi et permutandi Et loco ipsarum terrarum venditarum siue bonorum pro eis venditorum uel vendendorum Alias terras fertiliores maiorisque vtilitatis
et propinquas Residentie vestre Emendi et in permutationem Capiendi Cum voluntate Consilio et deliberatione Capituli prouincialis predicti prioratus per vos conuocandi totiens quotiens opus fuerit sicut
melius et vtilius et honorabilius pro nostra Religione et dicto prioratu vobis et dicto Capitulo prouinciali videbitur expedire. Committentes vobis et dicto Capitulo prouinciali in premissis agendis totaliter vices
nostras Ac interponentes in eisdem Auctoritatem nostri presentis generalis Capituli Ac si in ipso generali Capitulo confecta vt premittitur fuissent. In Cuius rei testimonium Bulla nostra Communis plumbea presentibus
est appensa. Datum Rhodi in nostro prefato conuentu durante dicto nostro Capitulo generali die Prima mensis Decembris Anno ab Incarnatione Jhesu domini nostri Millesimo quadringentesimo quinquagesimo quarto.