Wir Sigmunt von gotes gnaden kunig zu Ungern zu Dalmac(ien) zu Croac(ien) (et)c(etera) und marggrafe zu Brandemburg (et)c(etera) unde wir Jost von derselben gnaden marggrafe unde herre zu Merhern
bekennen und tun kunt offenlich mit dissem briefe allen den die in sehen oder horen lesen Als der alludurchluchtigiste furste unde herre her Wenczlaw Romischer kunig zu allen zeiten merer des
Reiches und kunig zu Behem von einem teile und die lancherrn zu Behem an dem andern teile uf uns mechtiglich unde gewaltiglich komen sein czwischen in die artikel uszuzsprechen die hernoch ge
schriben steen als das des egenan(ten) kuniges brieve wol uszweisent die er doruber hat gegebin Also uszsprechin wir zum irstem male daz der egenan(te) kunig seinen Rat haben sal die ih(e)n nochgeschriben
Zum irsten male den Erwirdigen Erczbischof zu prage den bischoff zu olomucz den bischoff von lutomissl h(er)n heinrich(e)n von Rosenberg und der sal auch burggrafe zu prage sein h(er)n wilhelmen
von landestein der sal sein der oberiste Camerer hinke Berka von hoenstein der auch der oberiste Czwoner sein sal h(er)n Brczenken von Skal der hofemester sein sal Benesch von der duben der hofemeist(er)
sein sal Smeyl genant flaschka von Richenburg lantschreiber sal sein Otto Bergaw von Bieli(n)a Johans von michalsp(er)g Boczko von podiebrad Borsche von Risemburg der Eler mit der bischoffe und
ih(e)n Ratz der egenan(te) kunig sunder des kunigreichs sachen uszrichten sal unde mag auch ander herren die im unde deme lande nucze sein in seinen Rat niemen zu den egenan(ten) und sal auch von den egenan(ten)
Ampten keinen ih(e)n entsetzen unde nichtes tun in den sachen die das landt antreten ane Ratz der egenan(ten) bischoffe unde ih(e)n und auch der die der egenan(te) kunig zu dissem dorzu sundernemen als
obgeschriben steet Auch sprechin wir das alle guter unde vesten der man sich undirwunden hat anerecht und ouch sust swes man sich in dissem kriege mit gewalt undirwunden hat das man die
widder gebin sal den den man sich undirwunden hat czwischen dissem nechstim heiligthum were abir das ymandes do kegin kein widderrede hette der sal das zu dem nechsten heiligthum vor den
lancherrn beweisen So sollin auch die lanch(er)rn zu dem nechsten heiligthum zu rechte siczen und die lanttafel sol man ufftu(n) unde sol in Steten unde in kreissen ruffen wer in dem rechte zu schaffen
hette daz yederman dohin queme do sollin die ih(e)n das rechte teilen unde was sie also teilen und das recht also uszsprechin als landes recht ist das sal also gehalden werden Ouch sprechin wir aus daz
die gelubde von den ih(e)n Steten Clostern in allin gebieten fustich tzeen und geton werden als es vanndt hie anginge ist gescheen das der egenan(te) kunig seine boten und briefe sende und die lant
herren dohin in die kreisse unde gebiete reyten unde gelubde von in eynemen sollen Auch sprechin wir aus daz in allen Steten unde kreissen fride gemachet werde und das man niemandes beschedigen
sol were abir das ymande schaden tete unde roubte daz deme das gen den gebessirt werde von den lantrichtern die dorzu gesecztit werden als das von alter erst gewesen Auch sprechin wir aus
ob ymandt der ih(e)n diener oder helffer in des egenan(ten) kuniges Steten geschriben weren von disses krieges wegen das die widder uszgeschriben werden unde frider gelievet in denselben Steten Es were
denne das sich von newes ymandes ichtes inwirchte und daz das geruffet wurde in allen Steten unde kreissen Ouch sprechin wir aus umb die munczen des behemischen gross(en) das eine marg feines
silbers gemunczet sol werden zu achtzig gross(en) also das dieselbin achtzig gross(en) haben sollen eine mark feines lautere silbers an der woge unde kornnge were abir daz das bergwerck gebessirt
so sollen die gross(en) ouch gebessirt werden dornach als sich das bergwerck gebessert und das sol czwischen hie unde sandt michaels tag gescheen und das sol der egenan(te) kunig sunder den egenan(ten)
lanch(er)rn mit brieffen vorwissen in aller masse als es in vormals uns(er) beider vater und ouch er vorgewisset haben Ouch sprechin wir aus umb die ih(e)n die man kmeten nennet die do v(er)mid sein
unde gesworen haben das dieselben siczen an rechten mitsampt and(er)n ih(e)n die dorzu gehoren unde sollen teylen als recht ist und was so auch richten unde teilen daz das vorgang habe Ouch
sprechin wir aus was von disses krieges wegen zu griffe unde name von beiden teylen gescheen sey von dienern unde helff(er)n daz das beyderseyte abesey unde hingelegit und das man dorumb nymande
in keynerweis anspreche noch in geistlichem oder werltlichem rechten Urkund dis briefes vorsigelt mit uns(er)n anhangenden Ingesigeln Gebin zu prage nach Cristi geburd dreyczehenhundert
Jar dornach in dem Sechzundnunczigstem Jare an deme heiligen Ostertage