Wir Rudolff von gotis gnaden chunig ze Behem und ze Polan, ver ichen und tuen chunt allen den die disen brief sehent lesent
oder horent lesen Daz wir unser haus Chlingeberch unserm lieben und getrewen hainrichen von Rosenberg obristem chamrer ze Behem
gesatzt haben, daz er daz selb haus also lang ze rechtem pfande inne haben sol, unz daz wir in gewaltich machen des hauses ze Rakez
in Osterreich mit alle dev, und dar zu gehoret, also swenne wir in des selben hauses gewaltich machen so sol er uns des vorgenanten hauses
Chlingeberch an alle wider red und an allen aufschub ab gesten, und ab treten und in unser gewalt antwurten, Geschech aber des nicht
daz wir in des eignanten hauses Rakez nicht gewaltig machten, so suln wir im in unserm chunigreich ander guet, daz als tewer sei
sam daz selbe haus ze Rakez ist geben, nach unser lieben, und getrewen hainrichs von Schowenberch, Tobiae von Beching obristes
marschalichs in Behem, und albrechts von Geberg, rat den wir daz ze verichten und ze vol bringen unsern gewalt haben ge
geben. Wer aber daz, daz nicht geschech daz hie vor ver schriben ist, so sol er daz selbe haus Chlingeberch ze rechtem pfande inne
haben also lange unz im gelaistet werde daz im gelobt ist, ob daz wer, des got nicht verheng, ob wir sturben, so suln unser
erben ob wir erben nach uns lassen alles des gebunden sein, daz vor verschriben ist. wer aber daz wir nicht erben nach uns liessen,
so sol swer chunig in Behem nach uns werde, iz sei hertzog friderich von Osterreich, oder ander unser Brueder, Ichemer, umb daz
vorgenante haus Chlingeberch gegen dem vorgenanten hainrichen von Rosenberg und auch er her wider gegen unsern erben oder
Bruedern, in allem dem gelubd sten als vor geschriben ist. Daz dise red und diz gelubd stet und unuerwandelt beleib, dar uber
geben wir disen brief, ze ainer urchunde versigilten mit unserm Insigil. Der brief ist geschriben und gegeben vor Hordiwitz Do von
Christes geburd waren ergangen Tausent, Dreyhundert Iar Dar nach in dem sibenten Iar An sand ulrichs tage.