Wenceslaus van boeme bider gratien gots hertoghe van lucembourch van loth(aringen) van brabant van limbourch marcgraue des heilichs rijcx Ende des selts op die side s(an)cte peters vicarijs generael
Ende Johanne bider seluer gratien hertoghinne ende wriue der seluer lande doen cont allen luden dat want die commandeur die prouinciaal ende die bruder vander duytsscher ordenen
vander baillien vanden biessen bi ons ten derden hertoghen in brabant vry hebben gheleest si ende alle haer goide van allen diensten corweiden taillen beeden ende allen anderen saken
om dat si ridderen sijn So willen wi si houden in allen haren vrieheiden Ende hebben om die speciaal onst die wi tot hen dragen om dat si onder ons sijn connen woenen tot trechte hen ende alle
hare goide ghevrijt Ende vrijen van allen beeden corweiden taillen ende allen andern dyensten soe waer si onder ons in onsen lande van brabant van outmase van dalfsem van valkenbourch
of eldre binnen onser heerlicheit gelegen sijn tot eweliken dagen Ende confirmeren hen alle haer preuilegien charten ende brieue ende haer vrieheiden die si van onsen vordonden hebben die wij
willen dat in hare machten ende virtuen bliuen gelijc ende in alre manieren dat si ghescreuen ende ghegeuen sijn Ontbieden daer om allen onsen bomeist(er)en drossaten ende rychteren die nu sijn
of hijr namaels van onsen weghen sijn selen dat si den voirs(creuen) commandeur prouinciaal ende brud(er) vander duytsscher ordenen paysselic vredelic en(de) rastelic houden in hairen voirs(creuen) goiden ende vrieheide
sonder tallie beeden of dyenst van hen te nemen also lijef als onse hulde ende haren dyenst hebben te behouden ende smid des ander ghebot van ons te wachten of van yemen anders van onsen weghen
Behoudelic alwees dien of si goide achte(n) binnen onsen voirs(creuen) landen die dyenst sculdich weren dat die goide alwees alsulken dienst souden moeten doen ende gheuen als te doen ende te gheuen
plagen eer si die cochten of vercregen sonder argelist In welks dings ghetughnissen wi onse segelen ghehangen hebben aen desen brief Ghegeuen tot bruessele vier dage in mey Int jaer ons
heren als men screef dusent driehondert tsestich ende seuen

Jux(ta) d(omi)nos ducem e(t) ducissam p(re)sentibus d(omi)no de lecka
de wesselaer de bouchout et de durnham militib(us)
et consiliarijs quor(um) mandato hec l(itte)ra est sigillata
Specht